Berriatuko mendien dibertsifikazio ekologikorako diru laguntzak emateko deialdia zabaldu dute
Udalaren helburua da kontserbazio basoak eta naturatik hurbileko baso ekoizleak sustatzea. Azaroaren 29a da azken eguna.
Berriatuko Udalak herriko baso eta mendien lanketan jarraitzen du. Bizkaiko Aldizkari Ofizialean herriko mendien dibertsifikazio ekologikorako diru laguntzak emateko oinarriak eta deialdia argitaratu ditu. Bigarren aldia da deialdia egiten dutena, udalaren baso dibertsifikazio ekologikorako estrategia planaren barruan kokatzen delako.
Eskaerak egiteko epea azaroaren 29an amaituko da. Udaletxeko erregistro orokorrean eman daiteke izena eta diru laguntzak lortzeko oinarriak Bizkaiko Aldizkari Ofizialean daude zehazturik. “Erabaki honen xedea da Berriatuko udal-mugarteko mendi pribatuetako baso-masak, sustatu nahi diren zuhaiztietara, egokitu eta/edo sortzeko egiten diren baso jardueretarako dirulaguntzak norgehiagoka erregimenean emateko oinarriak eta deialdia ezartzea”.
Diotenez, proposatutako basoak lortzeko BFAren baso laguntzak ez dira nahikoak. “Materialei eta lanei lotutako gastuetako batzuk beherantz modulatuta daude proiektutako baso batzuetarako. Gaur egungo abiapuntutik, gure mendien trantsizio ekologikoak epe luzea eskatzen du diru-sarrerak lortu arte”.
Errealitate hori eta ematen dituzten ingurumen eta gizarte zerbitzu ugariak kontuan hartuta, Berriatuko Udalak zuhaizti autoktonoak sortzen, egokitzen eta zaintzen laguntzeko ildo bat proposatzen du. Horretarako, Udalak 8.500 euro ditu bideratuta aurrekontuan.
