Azaroaren 23an ospatuko dute Berriatuko azoka
Urriaren 28a da parte hartu nahi dutenentzako izena emateko azken eguna
Beste urte batez bueltan da Berriatuko ekoizleen, artisauen eta animalien azoka. Aurten azaroaren 23an egingo dute, 10:00etatik 14:00etara. Hain zuzen ere, azokan postua jarri nahi dutenentzat izena emateko epea zabalik dago eta urriaren 28ra arte [astelehena].
Interesa dutenek Lea-Artibaiko Landagarapen alkartearen bulegoan eman beharko dute izena astelehenetik barikura, 9:30etatik 14:00etara bitartean, edo eta emailez landagarapena@leartibaifundazioa.eus helbidean. Informazio guztia udalaren webgunean dago eskuragarri, baita dokumentuak ere.
Berriatuako udalak ulertzen du lehen sektorea “garrantzitsua” dela: ekonomiarentzat, ingurumenarekiko errespetuarentzat, kontsumo jasangarriarentzat eta biztanleriaren osasunarentzat. Horregatik, “funtsezko sektore izanda”, bere bideragarritasunean laguntzeko hainbat ekimen aurrera eramaten ditu, besteak beste, azokak.
“Lea-Artibai eskualdean lehen sektoreak orokorrean eta lurreko produktuek izan duten eta daukaten garrantzia kontuan izanik, ezinbesteko jotzen da herritarrengana produktu hauek hurbiltzeko ekimenak aurrera eramatea”.
Horrez gain, herriko irabazi asmorik gabeko erakundeentzat ere tokia egongo da, egun horretako jardunetik jasotzen duten diruaren helburua herriko hezkuntza, ongizate, kultura eta/edo kirola bultzatu edo laguntzea izango da.
