Bost emanaldirekin dator Antzerkiaz Blai! egitasmoa
Sarrerak eskuragarri egongo dira azaroaren 7tik [eguena] aurrera, Turismo Bulegoan eta Mutrikuko Udalaren web orrian.
2023ko Antzerkiaz Blai! egistamoa. Akelarre Antzerki Taldearen emanaldia. Argazkia: Akelarre Antzerki Taldea. Aurten ere, egitarau biribilarekin dator Mutrikuko Udalak antolatutako Antzerkiaz Blai! egitasmoa, eta guztira, bost hitzordu zehaztu dituzte datozen asteetarako, azaroan hiru, eta abenduan, ostera, bi. Saio guztiak Zabiel Kultur Etxean egingo dira.
Umeei zein nagusiei bideratutako emanaldiak izango dira, eta sarrerak eskuragarri egongo dira azaroaren 7tik [eguena] aurrera, Turiso Bulegoan eta Mutrikuko Udalaren web orrian. Akelarre Antzerki taldeak eskainitako saioak doan izango dira, eta gainerakoek prezio berdina izango dute: 3 euro.
Azaroaren 9an [zapatua] ekingo diote egitasmoari, 18:00etan, herriko Akelarre Antzerki taldearen hiru antzezlan desberdinekin: Arratsaldero seiretan, Doktoreak, gure alabak senda ditzakezue? eta Roboten denda.
Bigarren hitzordua azaroaren azaroaren 17an izango da, Anita Maravillas konpainiak Andereño antzezlana eskainiko du. Honakoa, umeei zuzendutako saioa izango da: “Anita Maravillasen zazpigarren lana da Andereño. Haurrentzako eta familientzako txotxongilo-ikuskizuna da, irakasle baten eta bere eskola txikiaren istorioa kontatzen duena, maitasunetik eta elkarren zaintzatik eraikitako eskolarena, alegia”. Txotxongiloen estetika zaindua da antzezlanaren ezaugarrietako bat, “ezinbestekoa” baita konpainiarentzat: “Edertasunaren gaia funtsezko adierazpide gisa ulertzen du, mugimendua zainduz, bere bizitza-ilusio delikatua lortzeko”.
Tartean Teatroaren Ai gure Juaneteak! ikuskizuna da azaroaren 24an [domeka] oholtzaratuko dena. Hitzak eta musika uztartzen dituen antzezlana da honakoa, eta Mikel Laboaren abestiak gaur egungo gizabere baten begiradatik plazaratzen ditu. “Taula gainean aktore-musikari bat eta bi musikari-aktore. Hitzaren eremua aktorearenada, esatariarena. Baina aktorea ere musikari bihurtzen da tarteka. Musikaren eremua musikariena da. Baina musikariak ere ikuskizunaren parte dira, eta honenbestez, aktoreak”. Laboaren kantaren letren “berinterpretazioa” da, Patxo Telleria idazlearen ikuspuntutik; Hegazti errariak, Izarren hautsa, Bedeinkatua, Negu hurbila, Lili bat, Oi Pello Pello, Haika Mutil, Bada biga higa edo Ihes betea bezalako abestiez osatua.
Abenduko eskaintzei dagokienez, Olagarrua izango da lehenengoa, Olatz Beobide, Maitane Perez eta Nerea Arriola aktoreen eskutik. Abenduak 1ean egingo den saioa errua desagerrarazteko saiakera da, “gorputzetik, plazeretik eta fantasiatik”. Hiru emakume eta olagarro batek osatutako saio honen helburua erruekin amaitzea da: “Errudunak gara? Ba al daude erru txiki eta handiak? Erruak askatu nahi ditugu?”.
Egitasmoari hasiera emateaz gain, amaiera ere Akelarre Antzerki Taldearen eskutik joango da, abenduaren 14an [zapatua], 18:00etan. Eufrosina aztia, Ileapaindegia eta Azken entsegua izango dira eskainiko dituzten saioak.
EGITARAUA
Azaroak 9, zapatua
- 18:00. Arratsaldero seiretan, Doktoreak, gure alabak senda ditzazkezue? eta Roboten denda. Akelarre antzerki taldearen eskutik. Sarrera doan.
Azaroak 17, domeka
- 18:00. Andereño, Anita Maravillasen eskutik. Sarrera 3 euro.
Azaroak 24, domeka
- 18:00. Ai gure juaneteak, Tartean teatroaren eskutik. Sarrera 3 euro.
Abenduak 1, domeka
- 18:00. Olagarrua, Olatz Beobide, Maitane Perez eta Nerea Arriolaren eskutik. Sarrera 3 euro.
Abenduak 14, zapatua
- 18:00. Eurofosina aztia, Ileapaindegia eta Azken entsegua, Akelarre Antzerki Taldearen eskutik. Sarrera doan.
