Ingurumenaren aldeko ekimenak antolatu dituzte Ispasterren
Zapatuan [azaroak 9] eta domekan [azaroak 10] ekintzak antolatu ditu Ispasterko Udalak bestelako elkarteen laguntzagaz.
Ispasterko Udalak ingurumenaren zainketagaz duen konpromisoa argia da eta hitzekin bakarrik ez, ekintzekin berretsi nahi dute. Horregatik, asteburuan bi ekimen antolatu ditu bestelako elkarteen laguntzagaz.
Zapatuan [azaroak 9] Ispaster eta bere ingurua garbitzera aterako dira herritarrak. 09:00etan jarri dute hitzordua herriko plazan. Bertan materiala banatuko dute eta antolatzaileek argibideak emango dituzte denbora ahalik eta hobekien baliatzeko. Ondoren, bakoitza dagokion bere tokira abiatuko da eta bazterrak garbitzeari ekingo diote. 13:00etan elkartuko dira ostera ere herritarrak plazan eta egindako lanaren lehen balorazio bat egingo dute. Horrez gain, ostean, nahi dutenek mokadutxoa hartzeko aukera izango dute Haritz Aurre elkartean.
Helburu nagusia herriko ingurua “garbitzea eta kontserbatzea” dela azaldu dute. “Batzen garenok elkarlanean jardungo dugu eremu publikoetako zaborra (birziklatuko da) biltzeko. Ispasterreko itxura eta osasun egoera modu ikusgarrian hobetu ahal delako. Honek, eragin positiboa izan dezake konzientziazio ekologikoan, floraren, faunaren eta ekosisteman, gainera, harro egoteko arrazoia izan daiteke komunitatearentzat”, azaldu dute. Hain zuzen ere, besteak beste, Gurutze Gorriak, Ispasterko Nagusien Alkarteak, Otoio Kirol Elkartea edota Eskolako Familien Elkartea.
Konpromisoa
Domekako [azaroak 10] ekimena, berriz, umeen kontzentziarako izango da baliagarriagoa. Herriz Herri ekimenaren bitartez, Haurkuna haurrentzako iraunkortasunerako tailerrak egingo dituzte 11:30eetik aurrera. Azaldu dutenez, eguraldi onagaz kanpoko frontoia egingo dute, eta euria egitekotan probatokian.
“Talde sormena eta lankidetza bultzatzen duten dinamiken bidez, txikienek primeran pasa dezaten”
5 eta 11 urte bitarteko haurrentzako tailerrak dira. Jarduera ludikoen bidez, garapen iraunkartagaz eta 2030 Agendaregaz lotutako “balioak” landuko dituzte: energia eskuragarria eta ez kutsagarria, ekoizpen eta kontsumo arduratsua, urpeko eta ekosistemen bizitza. “Hori guztia talde sormena eta lankidetza bultzatzen duten dinamiken bidez, txikienek primeran pasa dezaten”, azaldu dute.
Herriz Herri ekimen ibiltariaren helburua da Bizkaiko ahalik eta udalerri gehienetara iristea da 2030 Agendagaz eta Garapen Jasangarrirako Helburuekin bat etorriz: “Gizarte eragin edo inpaktu sozial positiboa duten eta aukera berdintasuna, gizarteratzea eta garapen jasangarria sustatzen dituzten proiektuak elkarrekin lantzeko”. Proiektuagaz herritarren kohesioagaz eta ongizateagaz duten konpromisoa erakutsi nahi dute.
