Martxan dago Mutrikuko Iñigo Andonegi Argazki Lehiaketa
Argazkiak aurkezteko azkenengo eguna azaroaren 24a [domeka] izango da.
Aurten ere, Mutrikuko Udalak 2025. urteko egutegia osatzeko Iñigo Andonegi argazki lehiaketa jarri du martxan, eta zehaztu dutenez, lana aurkezteko azkenengo eguna azaroaren 24a [domeka] izango da. Parte hartu nahi duen edozein mutrikuarri bideratutako lehiaketa da honakoa, eta gaia, Mutrikuko altxorrak izango da: ondarea, natura, pertsonak, paisaia, ohiturak… Parte hartzaileek ondorengo galderari erantzun beharko diote, irudien bidez: “Zein da zuentzat Mutrikuk duen altxorrik preziatuena?”.
Parte hartzaile bakoitzak gehienez hiru argazki aurkeztu ahal izango ditu, formatu digitalean, Mutrikuko Udaleko web orrian dagoen estekan. Horrez gain, parte hartzaileek norbere lanak aurkeztu ahal izango dituzte, eta originalak izan beharko dira, “ezin izango da beste pertsona baten argazkirik aurkeztu, ezta ere, beste lan original baten elementurik gehitu”. Argazkien ezaugarriei dagokionez, koloretan, zuri-beltzean, edo bestelakoetan ere aurkeztu daitezke, guztiak, horizontalean egon beharko dira, eta elementu gehigarririk ezin da erantsi (sinadura, ur markak…). Formatuari dagokionez, 21×29,7 zentimetroko neurria izango da gutxienekoa, eta berezimena, 300 ppp-koa.
Epaimahaia udalak izendatutako bi adituk eta udaleko ordezkari batek osatuko dute, eta hamabi argazki aukeratu eta sarituko dituzte, argazki bakoitzak 90 euroko saria jasoko duelarik. Horrez gain, lehiaketara aurkeztutako lanekin erakusketa bat egingo da, eta herritarrek, bozka bidez, argazki bat aukeratuko dute. Aukeratutako argazkia egutegiaren azala izango da, eta sarituak 90 euroko bonoa irabaziko du, BERTAN elkarteko dendetan erabiltzeko. Hala ere, erakusketa aretoan 70 argazki sartzen direla azpimarratu du Mutrikuko Udalak, eta aurkeztutako argazkien kopurua altuagoa bada, epaimahaiak egingo du aukeraketa.
Mutrikuko Udaletik adierazi dutenez, lehiaketan parte hartzen dutenek, zehaztutako arauak onartu beharko dituzte aldez aurretik. “Aurkeztutako argazkiak, sariren baten irabazle izan edo ez, egilearen jabetzakoak izango dira, hala ere, udalak eskubidea izango du argazkiak agitaratzeko edota helburu komertzialik gabe erakusteko, beti ere, egilearen izena aipatuz”. Horrez gain, epaimahiaren erabakia aldaezina izango da, eta argazkiren batek indarrean dagoen araudia urratuz gero, antolatzaileek eskubidea izango dute lehiaketatik baztertzeko.
