Gaztaina erreen bueltan batu dira eskualdeko galiziarrak
Ondarroako Galiziar Etxeak hirugarren urtez jarraian antolatu du Magosto Eguna. Gaztainez gai, askotariko produktu galiziarrak dastatzeko aukera egon da. Bihar [azaroak 17] ere, jaiak jarraitu egingo du.
Hirugarren urtez jarraian, Ondarroako Itsasaurren elkartu dira gaur [azaroak 16] eskualdeko galiziarrak. Ondarroako Galiziar Etxeak Magosto Eguna antolatu du aurtengoan ere, eta ezin hobeto erantzun dute herritarrek. “Jai berezia” da galiziarrentzat azaroan ospatzen dutena, eta eguna ederra pasatzeko “ilusioz” dago Armindo Peso Ondarroako Galiziar Etxeko presidentea ere: “Eguraldi ona dago, eta espero dugu gaur eta bihar jendea etortzea. Oso jai berezia da galiziarrontzat; Galiziako leku askotan ospatzen da. Gogoz eta ilusioz gaude egun berezi honetan”.
Jada herritarren artean zabalduta dagoen jaia da Magosto Eguna, baina, Ondarrutarrak ez ezik, eskualdeko jendea ere gerturatu da Ondarroara: “Herritar asko etortzen dira, eta baita inguruko jendea ere: Markina-Xemein, Berriatua, Mutriku, Lekeitio… Hemen galduta egon den tradizioa zen gu antolatzen hasi garen arte, eta orain, hirugarren urtea denez, jendea ohitzen hasi da. Pixkana jaia berreskuratzen ari gara”. Hala, gaztaina erreak eta produktu galiziarrak dastatzeko aukera eduki dute bertaratu direnek.
Musikak ere, ez du hutsik egin. Urtero bezala, aurtengoan ere Ondarroako Galiziar Etxeko Os Novos Mariñeiros gaita taldea aritu da musika jotzen. Magosto Eguna antolatzen hasi zirenetik ez dute hutsik egin, eta aurtengoa heltzeko ere, gogoz zeuden gaita jotzaileak: “Hemengo elkarteko taldea gara, baina Bilbo inguruan bizi gara; hamabi urte inguru daramatzagu jotzen. Oso pozik gaude aurten ere hemen egoteaz, eta gogoz eta ilusioz gaude gaur eguna ospatzeko. Gaztetxo batzuk ere taldera batu dira, eta hori oso pozgarria da guretzat, ze, ez da erraza instrumentu tradizionalekiko interesa sortzea eurei. Oraingoz, ziurtatuta daukagu jarraipena”.
Goizeko jardunaren ostean, bazkaritarako elkartuko dira. 23:00ak arte ospatuko dute jaia, eta bitarte horretan, Queimada ere egingo dute. Gaur bertaratzeko aukerarik izan ez dutenek, bihar [azaroak 17] ere edukiko dute gaztain erreak eta produktu galiziarrak dastatzeko aukera: “Asmoa, domekan ere 23:00ak arte egotea da, baina hori eguraldiaren eta jendearen arabera izango da”.
