Errelebo bila dabiltzan negozioen salerosketa sustatuko du NegoziON programak

Leartibai Fundazioak NegoziON programa ipini du martxan: funtzionamenduan dauden eta errelebo bila dabiltzan negozioen salerosketa sustatuko duen programa da. Programaren inguruko jardunaldia egingo dute eguenean [azaroak 28] Markina-Xemeinen.

Garaia Pagola Urriza

Lea-Artibai eta Mutriku

2024/11/25

Leartibai Fundazioak errelebo bila dabiltzan negozioak eskualdatzeko programa ipini du martxan, NegoziON programagaz. Jardunaldia egingo dute eguenean [azaroak 28], 15:00etatik 16:00etara, Markina-Xemeingo Lea-Artibai Berrikuntza Gunean.

Funtzionamenduan dagoen negozio bat erosi nahi dutenentzat ipini duten martxan programa, horren bitartez, errelebo bila dabiltzan enpresa aktiboak herritarren eskura ipiniz. DEMAko eta Enpleguko eta Ekintzailetzako Foru Agentziako teknikarien eskutik informazioa eskaintzeagaz batera, programak eskaintzen dituen abantailak ere ezagutuko dituzte programan parte hartzen dutenek. Hala, izena eman behar da euren sare sozialetan zabaldu duten galdetegiaren bitartez.

[GALDETEGIA]

NegozioON programak hainbat abantaila eskaintzen ditu negozioa eskualdatzea pentsatzen ari diren pertsonentzat. Fundaziotik argitu dutenez, norbere enpresarentzat “ikusgarritasun osoa” eskainiko dute programagaz. Era berean, balizko erosleekin harreman zuzena izateko aukera, prozesu osoan laguntza eta metodologia profesionala eta pertsonalizatua ere, eskainiko dituzte. Gaineratu dutenez, %100 diruz lagundutako programa da.

Erosleentzat, ostera, beste hainbat abantaila izango ditu programak. Alde batetik, jardueragaz berehala hasteko aukera izango dute, laguntza pertsonalizatuagaz. Era berean, erosleek 20.000 eurorainoko dirulaguntza jaso ahalko dute, negozioa erosi ahal izateko. Bestalde, funtzionamenduan dagoen negozio bat izango denez, “arriskua murriztea” lortuko dute programaren bitartez, eta baita “bezeroen konfiantzari eustea” ere.