'Artearen ibilbidea' erakusketa Markina-Xemeinera heldu da
Abenduaren 2ra arte 38 panelez osatutako erakusketa ikusteko aukera egongo da Bizenta Mogel parkean. Artean haurtzaroa zelan irudikatzen den ikusi daiteke bertan.
Hainbat artelanek ibilbide luzea egin dute Bizkaiko herrietan barrena. Joan den maiatzean ipini zuten martxan BBK-k eta Arte Ederren Bilboko Museoak Artearen ibilbidea erakusketa, eta heldu berri da Markina-Xemeinera. Erakusketa ikusteko azkenetariko aukera izango da Markina-Xemeingoa, eta bertan egongo da abenduaren 2ra arte.
Markina-Xemeingo Udalak erakusketa herrira ekartzeko eskaera egin zuen, izan ere, argi dute artea fisikoki ikusi eta sentitzen dena baino askoz gehiago dela: “Alde batetik, gaia ederra eta polita da. Beste aldetik, mundu osoan erabiltzen diren garapen jasangarrirako helburuekin bat egiten dugu, eta hor, kulturari dagokionez, kultura gizartearen eraldaketa motor gisa ulertu behar dela diote. Eta horretan sinetsita, herritarrei eskaini nahi diegu erakusketa”.
38 panel ipini dituzte Bizenta Mogel parkean, eta denak ere, haurtzaroarekin lotura dituzten artelanak dira. Munduko pintore “oso ospetsuen” lanak dira bertan ikusi ahalko direnak: “Eurek haurtzaroa zelan irudikatzen duten ikusten da erakusketan. Artelan denetan ez dira umeak argi eta garbi ikusten, baina haurtzaroa zelan islatzen duten ikusi daiteke”. Kalitate “oso onean” egindako artelanak dira, eta azalpenek osatzen dute erakusketa: “Azalpen txiki bat dauka artelan bakoitzak. Panelean, gainera, QR kodigo bat dago, eta bertatik lau hizkuntzatan irakurri daiteke azalpena. Horrekin batera, egilea, urtea eta beste hainbat datu ere ezagutu daitezke”.
Herriko hainbat ikaslek erakusketa ikusteko aukera edukiko dute, euren eskolagaz joango baitira; gainontzeko herritarrei ere erakusketa ikustera joateko deia egin dute udaletxetik. Erakusketaren hurrengo geldialdia Durangon izango da, hain zuzen ere, Durangoko Azokagaz batera: abenduaren 2tik 8ra egongo da bertan.
