Gabonetako energia kontsumoa "murrizteko", erakundeei "arduraz" jokatzeko eskatu die Eguzkik
Gabonetako argiak beranduago pizteko eskaera egin dio talde ekologistak Lea-Artibaiko Amankomunazgoari; abenduaren 19tik urtarrilaren 6ra, gutxi gorabehera.
Gabonetako argiak, Alamedan Abenduko datetara hurbiltzen gabiltzan honetan Gabonak geroz eta gertuago ditugu; kaleak eta plazak argiz apainduta egongo dira laster, eta jendea alde batetik bestera ibiliko da, erosketak egin eta egin. Gabonetako argiek sortzen duten kontsumo maila altua dela eta Lea-Artibaiko Eguzkik “ardura” eskatu die erakundeei: “Eguzki bezala ulertzen dugu erakundeek ezin dutela apaltasunez jokatu klima-aldaketa geldiarazteko neurriak hartzerakoan. Erakundeek eredu eta arau batzuk eman behar dituzte mendebalde industrializatuaren berezko energia kontsumoaren erritmo handia geldiarazteko”. Neurri “sendorik” hartu ezean, berotegi-efektuko gasen isurketei dagozkienez hartutako nazioarteko konpromisoek ezarritako helburuak betetzea ezinezkoa izango dela azpimarratu du talde ekologistak: “ondorioz, klima aldaketak hondamendi izugarria lortu ditzake epe laburrean”.
Erakundeek “energiarekiko erabilpen arduratsua” bete behar dutela azpimarratu dute, “guretzat eredu izan daitezen”, horrela, energia kontsumoa gutxitu eta udalentzako eta ingurumenarentzako ondorio onuragarriak ekarriko lukeela nabarmendu dute. Hala, Gabonetan kaleetan pizten diren argiak, beranduago pizteko eskaera egin dio talde ekologistak Lea-Artibaiko Amankomunazgoaria: “Lea- Artibaiko Amankomunazgoari eskatu diogu proposa dezala, parte diren udaletan, Gabonetan kalean pizten diren argiak abenduaren 19tik urtarrilaren 6ra piztea, gutxi gorabehera, 18:00etatik 24:00etara bitartean. Izan ere, ordutegi honetatik kanpo populazioaren zati oso txiki batek ikusi baititzake argiak”.
Horrez gain, aipatutako ordutegietara moldatzeko, tenporizadore bat jartzeko gomendioa eman du Eguzkik: “Modu horretara, %50 baino gehiago jaitsiko litzateke kontsumoa, aurreko urteekin konparatuz. Eta ondorioz, berotegi-efektuko gasen emisioa ere neurri berean murriztuko litzateke”.
Erakundeez gain, herritarrei ere kontsumo arduratsua izateko eskatu die Lea-Artibaiko Eguzkik: “Garai kontsumista hauetan, bereziki garrantzitsua da herritarrei gogoraraztea kontsumo kritiko, lokal, arduratsu eta solidarioak duen garrantzia, gero eta agerikoagoa eta ukaezinagoa den gizarte eta ingurumen krisiari aurre egiteko. Denon artean lortuko dugu!”.
