Ibilbidea errepikatuko du Berriatuko Krosak
Domekan [azaroak 15] egingo dute, izen ematea egunean bertan egin behar da, doan.
Lea-Artibaiko korrikazaleek asteburu bete-betea dute. Zapatuan [abenduak 14] Ondarroako Egia Iriondo Memoriala lehiatuko dute eta domekan [abenduak 15] II. Berritxuko Krosa. Aurten gainera, iazko harrera ona ikusita, Berriatuko Udalak eta Urepel kirol taldeak iazko ibilbidea errepikatzea erabaki du.
Hau da, bi aukera egongo dira. Batetik, lasterketa laburra 5 kilometrokoa da, eta bestetik, luzea 10 kilometrokoa, bi itzuli ibilbideari, hain zuzen ere. Aurten ere herri inguruan egitea erabaki dute, Errege Bideko Krosa apur bat atzean utziz. Herriko plazatik aterako dira, Lantegi Batuakera helduko dira eta Andonegiko zubia igaroz, Mugartegi baserrira helduko dira eta Cikautxoko krutzea eta zubia pasa ostean irteeran amaituko dute lasterketa.
Ohi bezala, ez dago aurretik izena eman beharrik, domekan bertan 09:30etik aurrera egin daiteke, eta gainera doako lasterketa da. 10:30ean emango diote hasiera krosari. Parte hartzaileentzako sarien zozketak egingo dituzte Hemen Bertokoa eta Spiuk laguntzaileen eskutik. Horrez gain, antolatzaileek gogoratu dute dutxa hartzeko aukera egongo dela amaieran, baita montxorra ere.
