Irratsaioa edo podcasta egiten ikasteko tailerra antolatu du Radixu Irratiak
Zapatuan [abenduak 14] batuko dira Radixu Irratiaren estudioan, eta bertan, irratia erakusteaz gain, bertaratzen direnen asmoak entzungo dituzte.
“Irratsaioa edo podcasta nola egin jakin nahi?”, horrela dio Radixu Irratiak argitaratu duen kartelak. Izan ere, irratsaioa do podcasta egiten ikasteko tailerra antolatu du Ondarroako irratiak. Zapatuan [abenduak 14] batuko dira lehen aldiz, Radixu Irratiaren estudioan, 16:00etan, eta interesa duen guztientzako irekita dago. “Irratsaio edo podcast tailerra egingo dugun lehen aldia da. Jende desberdinaren interesa ikusita erabaki dugu ikastaroa egitea”. Helburua, herritarrengana heltzea da, “helarazi nahi duguna, zera da, herrian irrati bat daukagula, eta ateak irekita dituela nahi duenarentzat”.
Zapatuan [abenduak 14] Radixu Irratiaren estudioa erakusteaz gain, bertaratzen direnen ideiak entzungo dituzte antolatzaileek: “Deialdiaren erantzuna nolakoa den ikusiko dugu, eta bertaratzen direnei estudioa erakutsiko diegu; materiala, nola egiten ditugun irratsaioak… Horrez gain, jendearen asmoak entzun eta bertan erabakiko dugu noiz batuko garen tailerra egiteko”.
Tailerrari dagokionez, arlo teknikoa lantzea izango litzateke lehen pausoa: “Behin informazioa helarazi eta ideiak entzunda, hurrengoko data jarriko dugu, eta bertan, arlo teknikoa landuko dugu. Soinu mahaia nola erabiltzen den erakutsi, mikrofonoak nola funtzionatzen duen ikusi… horrelakoak egingo ditugu”. Irratsaioa ez ezik, podcasta nola egin ikasteko tailerra ere bada honakoa: “Gaur egun podcastak asko entzuten dira, eta ondo funtzionatzen dute. Pentsatu dugu gazteek interes gehiago izan dezaketela podcastean, beraz, hori ere landuko dugu”.
Radixu Irratiak interesa duten guztiei dei egin die, zapatuan estudiora bertaratzeko: “Radixu Irratiaren ateak zabalik daude interesa duten guztientzat, animatu zapatuan kanpandorrera! Irratia tresna polita da, baita irratsaioak egitea ere”.
