Mutrikuko Mijoa auzoko errekako saneamendu sarea gauzatzea "exijitu" du Eguzkik
Duela urtebete egindako salaketa berdina jarri du mahaigainean Lea-Artibaiko Eguzki Talde Ekologistak.
Duela urtebete, 2023. urtea bukatzear zegoela, Mutrikuko Saturraran hondartzara isurtzen den Mijoa errekan saneamendurik ez zegoela salatu zuen Lea-Artibaiko Eguzki talde ekologistak, eta aurten ere, salaketa berdina mahaigaineratu du. Mijoako saneamendu proiektua eta horrekin lotuta dagoen bidegorria “lehenbailehen” gauzatzeko eskatu du berriro ere: “Salaketa hau duela urte bete egin genuen berdina da. Mutrikuko Mijoa auzoko saneamendu-sare berriaren egoera egiazta daiteke, eta eremu horretako bidegorria ez da batere aldatu. Inplikatutako erakundeek ez dute ezer egin”.
Hori horrela, erakundeek “ardura” hartzeko lanean jarraituko du Eguzkik: “Eusko Jaurlaritzak, Gipuzkoako Foru Aldundiak eta Uraren Euskal Agentziak beste aldera begiratzen dute. Jarduera bakarra Uraren Euskal Agentziak egin du: Saturrarango hondartzako zerbitzuak eta kantina itxi. Besterik ez du egin uda honetan. Hori al da irtenbidea? Mutrikuko Udalak ere ez du ezer egin. 2024an informazioa lortzen saiatu garen alditan, ez digute ezer esan”.
Aurrekariak. Eguzkik urteak daramatza errekako saneamenduaren inguruko irtenbideak “exijitzen“: “Salaketa hau dagoeneko Eguberritako klasiko bat da. Izan ere, herri-erakundeek elkarren artean hainbat lan hidrauliko egiteko hitzarmen bat izenpetu zuten 2007an. Horren arabera, Mijoako saneamendua 2011rako martxan egon behar zen, baina urteak pasatzen joan dira eta egindako promes guztiak alferrikakoak izan dira”.
“2021eko otsailean, saneamendu-proiektuaren idazketa lizitatu zuen Uraren Euskal Agentziak. Eta joan den maiatzean, berriz, udal hauteskundeak zirela eta, Arantxa Tapia Ekonomia Garapeneko sailburua eta Antonio Aiz Uraren Euskal Agentziako zuzendaria Mutrikura etorri ziren, Ion Gambra EAJko alkategaia babestera. Orduan, Mijoako Saneamendu-proiektua eta horrekin lotuta dagoen bidegorria lehenbailehen gauzatu behar zirela esan zuten, eta legealdi berrian Mutrikuko EAJren lehentasuna izango zirela”, adierazi du talde ekologistak. Ordutik, ordea, auzi honen inguruko albisterik izan ez dutela azpimarratu dute: “Baina lasai, laster hauteskunde kanpaina berri bat izango dugu, eta oraingoan, autonomikoena”.
