'Aitatasun aktiboak eta arduratsuak' ikastaroa eskainiko dute Etxelilan
Gizonei zuzendutako bigarren ikastaroa izango da honakoa, eta urtarrilaren 14an [martitzena] burutuko da, 17:00etan, Etxelilan. Urtarrilaren 10a baino lehen eman beharko da izena.
Maskulinitateari buruzko gogoeta kritikoa sustatzeko helburuagaz, gizonei zuzendutako Gizonak eta feminismoa ikastaro zikloa abiarazi zuen azaroan Ondarroako Etxelilak. Guztira lau ikastarok osatuko dute zikloa, saio bakoitzean gai zehatz bat landuko delarik. Azaroaren 12an izan zuten lehenengo hitzordua, eta bigarrena, urtarrilaren 14an [martitzena] izango dute, 17:00etatik 20:00etara, Etxelilan. Hala, Emagin Elkarteko Asier Arizkorreta Hurtadoren gidaritzapean burutuko dira ikastaro guztiak.
Aitatasun aktiboak eta arduratsuak izango da bigarren saio honetako hizketagaia, eta “iritziak eta esperientziak elkartrukatzeko” aukera izango dute bertaratzen direnek. “Gurasoak hazkuntzan modu aktibo eta ekitatiboan nola parte har dezaketen aztertuko da, lana eta familia orekatuko dituen eta seme-alaben garapen integrala erraztuko duen aitatasun kontziente bat sustatuta”.
Parte hartzeko beharrezkoa izango da aurretiaz izena ematea, urtarrilaren 10a baino lehen, eta ikastaroaren prezioa bost eurokoa izango da. Hiru aukera egongo dira izena emateko; telefonoz, 94 613 40 08 zenbakira deituta, posta elektronikoz, etxelila@ondarroa.eus helbidera mezua bidalita, edo presentzialki, Etxelilan bertan izena emanda. Antolatzaileek adierazi dutenez, ikastaroaren egunean bertan ordaintzeko aukera egongo da.
Gainontzeko ikastaroak. Ikastaro zikloari jarraipena emateko, beste bi saio egongo dira Etxelilan. Hirugarrena, martxoaren 11an [martitzena] egingo da, 17:00etan, Gizontasuna eta sexualitatea: zerk egiten nau hetero? izenburupean. Maskulinitatearen eta sexualitatearen arteko harremana aztertuko da bertan, heterosexualitatea zalantzan jarriz. Laugarren saioa maiatzaren 13an [martitzena] burutuko da, 17:00etan. “Gizonek eraso matxistak aitortzeko eta horien aurrean jarduteko duten erantzukizuna izango du ardatz, aliatuen ikuspegitik, modu eraginkorrean esku hartzeko eta pertsona guztientzako ingurune seguruago batean laguntzeko lan eginez”.
