Doako euskara klaseak eskainiko ditu Mutrikuko Udalak
Matrikulatzeko epea urtarrilaren 8an hasi zen, eta 24ra [barikua] arte egongo da zabalik.
Mutrikuko Udalak doako euskara klaseak eskainiko ditu otsailetik ekainera arte, eta interesdunek udaletxeko harreran eman beharko dute izena, urtarrilaren 24a [barikua] baino lehen. “Euskal Herriaren hizkuntza propioa euskara da, baina urteetan zehar zapaldua izan da eta debekupean egon da. Hori dela eta, euskararen etorkizuna ez dago bermatuta. Horregatik gabiltza euskara sustatzeko neurriak hartu nahian”, adierazi du Mutrikuko Udalak.
Klaseetan izena ematen duten ikasleak oinarrizkoenetik hasiko direla azpimarratu du udalak: “Hasiera hasieratik oinarrizkoenetik hasita ikasi ahal izango da euskara Mutrikuko Udalak egindako eskaintza honekin. Euskara hutsetik eta doan ikasteko aukera eskainiko baitugu urtarriletik aurrera”.
Mutriku euskararen arnasgune izaten jarraitzeko horrelako eskaintzak beharrezkoak direla nabarmentzeaz gain, euskara ikasi nahi dutenei zuzendutako mezua bidali du udalak: “Herri euskaldun batera etorri zarete bizitzera. Konturatuko zineten bezala, hemen euskaraz bizi gara. Herritar gehienak darabilte euskara, etxeko hizkuntza horixe baitute, eta horrelako lekuetan izaten ditu gure hizkuntzak garatzeko baldintzarik onenak. Horrelako herriak udalerri euskaldunak edo euskararen arnasguneak direla diogu, eta oso garrantzitsuak dira hezkuntza gutxitu batentzat bizirauteko. Animatuko al zara zu ere euskara ikastera?”.
