Euskadiko kros txapelketan seigarren postua lortu du Izaro Aranburu aulestiarrak
Ordizian lehiatu zen Euskadiko Kros txapelketa domekan [urtarrilak 12].
Domekan egin zen Euskadiko Kros txapelketaDurango Kirol Taldea Euskadiko Kros Txapelketa lehiatu zen Ordizian pasa den domekan [urtarrilak 12], eta emakumezkoen sailkapen orokorrean Durango Kirol Taldeko Izaro Aranburu Rementeria aulestiarrak seigarren postua lortu zuen 8.15 kilometroko lasterketan 40 minutu eta 10 segundoko denboragaz. Hala, 23 urtez azpiko emakumezkoen sailapenean bigarren gelditu zen aulestiarra.
Aranbururen helburua lehenengo postuetako bat lortzea bazen ere, orkatilak ez zion lagundu: “Fisikoki ondo nengoela banekien, eta baita baldintzak nituela lasterketa irabazteko. Baina bigarren kilometroan, orkatilaren ezegonkortasunak ez zidan lagundu korrika egiteko orduan, eta ezin izan nuen lasterketa ona egin. Lurra ere oso egoera irregularrean zegoen, lokatzez beteta. Frustrazio apur bat sentitzen dut, ezin izan nuelako gustatuko litzaidaken lasterketa egin”. Behin Euskadikoa eginda, urtarrilaren 26an [domeka] Getafen burutuko den Espainiako txapelketan dauka begirada Aranburuk: “Txapelketa horretan ahal dudan guztia emango dut”.
Lekeitioko Txismita Taldeko Paule Garcia De Andoin Lakak bigarren postua lortu zuen 18 urtez azpiko emakumezkoen sailkapenean, 4.55 kilometroko lasterketan, 19 minutu eta 46 segundoko denboragaz.
