Gabonetan erabilitako pirotekniak herrian "kezkak" sortu dituela adierazi du Ondarroako Udalak
Gabonetan pirotekniako materialak sortu dituen kalteak ikusita, datorren urtera begira neurriak "gogortuko" dituela adierazi du Ondarroako Udalak.
Gabonetan udaltzaingoak adingabeei atzemandako materiala. Ondarroako Udala. Gabon egunetan, urtero legez, handitu egin ohi izan da pirotekniako materialaren erabilera, eta aurten, Ondarroan, herritarrek beraien “kezka” adierazi die udalari, izan ere, udaltzaingoak gaiaren inguruan jasotako telefono deiak “asko” hazi dira: “Herritar askok egunak daramatzate udalagaz harremanetan Gabonetan eztanda egin duten gailu piroteknikoak sortu dituzten kalteak direla eta. Data hauetan urtero handitzen da halakoen erabilera, baina ez soilik baimendutako gailuena, baita baimendu gabeko material piroteknikoena ere”.
Ondarroako Udalak adierazi duenez, datorren urtera begira neurriak “gogortuko” ditu: “Guzti honi aurre egiteko eta batez ere kontzientzia sortzeko, urte guztiko lanketa egitea beharrezkoa da. Horretarako, udala, ikastetxeak, gurasoak, umeak, helduak, saltzaileak… kontuan hartu eta hurrengo Gabonetan egoera hauek ez errepikatzeko bitartekoak ipiniko dira”.
Sortutako kalteei dagokienez, Gabon Zahar gauerdiko su-artifizialak izan dira herritarren artean kezka handienetakoa sortu duena: “Udalak ez du baimendu halakorik botatzea eta herritar batek baino gehiagok bota ditu, horrek dakartzan kalte posibleak kontuan hartu gabe”. Zubi Barritik bota ziren su-artifizialak jarri ditu adibide gisa udalak, eta hauen “arriskua” azpimarratu du: “Zubi Barritik botatako su-artifizialek gorabehera sortu zituen Artibai egoitzako egoiliarrengan, beraiengandik oso metro gutxira bota baitziren. Kontuan hartzekoa da baita ere, su-artifizial hauetakoren bat Alde Zaharraren goiko aldeko etxeren baten gainean eroriko balitz, zer nolako kalea eragingo lukeen, inguru horretako etxe gehienak egurrezko egituradunak direlako eta elkarren ondo-ondoan daudelako”. Arrigorri hondartzatik ere bota zirela aipatu du udalak, eta udaltzainek botatzen ari zirenak identifikatu zituztela.
Horrez gain, urtarrilaren 3an [barikua] Erribera kaleko eraikin batek sua hartu zuen Plazagainetik botatako petardo baten ondorioz: “Larrialdi zerbitzuen zein bertan zeuden herritarren erreakzioak ondorio larriagoak egotea saihestu zuen. Eraikin horrek osorik su hartuz gero kalteak ikaragarriak izango ziren Alde Zaharrean”.
Gertakari hauez gain, Ondarroako Udalak aipatu duenez, udaltzainek “arrisku handiko” hainbat material pirotekniko atzeman dizkiete zenbait adingaberi: “Herriko denda batzuetan ere ibili dira udaltzainak, materiala non, nola eta zeini saltzen dioten ikertzeko”. Bide batez, material honen erabilerak herritarrei eragin ahal dizkien kalteak azpimarratu ditu udalak: “Esan beharrik ez dago suziri eta antzekoak erabiltzeak zelako kalteak eragiten dizkien haur oso txikiei, adinekoei edota hotsekiko sentsibilitate handia duten pertsonei, hala nola espektro autistaren nahasmendua dutenei. Eta baita animaliei ere”.
