Nazareno Eguneko kontzertua eskainiko du Mutrikuko Musika Bandak
Mezaren aurretik Goiko Plazatik Santa Katalina komentura arteko kalejira egingo du Mutrikuko Musika Bandak, eta ondoren, Zabiel Kultur Etxeko ganbaran eskainiko dute kontzertua.
Urte luzeetako tradizioa duen hitzordua da Mutrikuko Nazareno Eguna, izan ere, iraganean Gabonei amaiera emateko eguna zela zioten mutrikuarrek. Urtarrilaren 19an [domekan] ospatuko dute, eta Mutrikuko Musika Bandak kontzertua eskainiko du Ibai Pastorren gidaritzapean, 13:00etan, Zabiel Kultur Etxeko ganbaran. Gainera, urtero legez, Santa Katalina komentuan meza egongo da 1o:30ean, eta aurretik eta ondoren, kalejira egingo dute musika bandakoek, Goiko Plazatik komentura, eta buelta. Herriko arrantzaleen ohorezko santuaren eguna da honakoa, eta herriko zenbaitentzat, data garrantzitsua da Nazareno Eguna.
Egun horretako abestiak desberdinak izaten direla adierazi dute musika bandako kideek, bat izan ezik: Mutrikuar abestiak. Itxuraz, Mutrikuko abesti desberdinez osatutako kantua da, Iñaki Lekubek sortu, eta Miguel Arrietak moldatuta. “Abesti horien barruan Mutrikuko Salbea deituriko bat dago, eta kantu hori, Nazareno Egunean jo eta kantatzen da”.
Zabielen eskainiko duten saioan zazpi pieza joko dituztela aurreratu dute:
- Guadix (P. Azpiazu).
- La canción del olvido (J. Serrano).
- Hungarian dance (J. Brahms).
- Out of Africa (J. Barry/moldaketak: J. de Meji).
- James Bond (S. Bulla).
- Caribean concerto (K.Vlak).
- Mutrikuar abestiak (I. Lekube /Moldaketak: Miguel Arrieta).
