Goxua Txapelketako bosgarren jardunaldia, bederatzi partidagaz
Bihar [urtarrilak 23] 19:45ean hiru partida jokatuko dituzte: Latxi-Goitia eta Uriguen-Azurmendi, Onagoitia-Urizar eta Varela-Unanue eta azkenik, Muñozguren-Kato eta Anso-Legarra.
Aurrera doa Goxua Txapelketa. Oraindik ere martxoaren 28ra bitarte pilotariek bide luzea egin behar duten arren, txapelketa “martxa onean” doala ziurtatu dute. Laugarren jardunaldia jokatu berritan, prest daude bosgarrenari ekiteko; eguenetik [urtarrilak 23] domekara [urtarrilak 26] bederatzi partida jokatuko dituzte.
Eguenean 19:45ean hasiko dute lehia frontoi txikian. Lehenengo mailako hiru partida ikusi ahal izango dira: Latxi-Goitia eta Uriguen-Azurmendi, Onagoitia-Urizar eta Varela-Unanue eta azkenik, Muñozguren-Kato eta Anso-Legarra. Barikuan ere, ordu berean jokatuko dute Esnaolak eta Mujikak Zubiriaren eta Gomezen aurka.
Zapatuan ostera, arratsaldeko EPELen Binakako Txapelketa tarteko, goizean jokatuko dituzte partidak. 10:30etik aurrera Berasaluze eta Isasi neurtuko dira Gorostizagaren eta Arandiaren aurka, eta Xabi Arteaga eta Koldobika Puente, ostera, Perran anaien aurka.
Bosgarren jardunaldiagaz amaitzeko, bigarren mailako hiru partida ikusi ahalko dira domekan, 18:00etatik aurrera: Adorrixa-Gandixa eta Igor Jaio-Aitxulua, Atxura-Malaxetxebarria eta Andoni-Jokin eta asteagaz amaitzeko, Arrieta anaiak eta Asier Egaña-Igor Loidi.
Partidak orekatuz. Orain arte denetarik ikusteko aukera egon da Markina-Xemein Esku Pilota Taldeak urtero antolatzen duen txapelketan, partida zailagoak nahiz errazagoak. Lehia estutzen joan ahala, partidak ere orekatuagoak direla adierazi dute antolatzaileek, eta laugarren jardunaldia izan da horren erakusgarri.
Zugadik eta Gorosabelek eman zieten hasiera asteko partidei, Txirloiren eta Allendaren aurka; lehenengoek 18 eta 13 irabazi zuten.
Zapatuan lau partida jokatu zituzten pilotariek, eta denak ere, “nahiko parekatuak” izan ziren. Aldapek eta Aranburuk bi tantorengatik galdu zuten Iñakitoren eta Agarreren aurka, azken horiek 18 eta 16 irabazi zuten. Ostean, Adorrixa-Gandixa eta Arrieta anaien arteko lehia ikusteko aukera egon zen, eta 18-15 irabazi zuten Adorrixak eta Gandixak. Anituak eta Basterretxeak nagusitasuna erakutsi zuten Atxurraren eta Malaxetxebarriaren aurka (18-12), eta baita Andonik eta Jokinek ere, Asier Egañaren eta Igor Loidiren aurka (18-13)
Domekan, ostera, Zugadi-Gorosabel eta Txirloi-Allendaren aurkako partida ikusteko aukera egon zen. Azken bikotea hurbil ibili zen arren, Zugadik eta Gorosabelek aurrea hartu, eta 18-13 irabazi zuten.
