Euskal Kostaldeko Geoparkeak Geoparkeko Bira ibilbidea aurkeztu du Fiturren
Geoparkearen eskaintza turistikoa zabaltzeko Geoparkeko Bira produktua aurkeztu du Euskal Kostaldeko Geoparkeak Fiturren. Kostaldearen eta barnealdearen arteko oreka sustatzera datorren produktu modura aurkeztu dute Madrilgo azokan.
Libe Otegui aldundiko Turismoko zuzendaria, Iñaki Ostolaza Euskal Kostaldeko Geoparkeko presidente eta Zumaiako alkatea, Leire Barriuso Euskal Kostaldeko Geoparkeko kudeatzailea,
Alazne Txurruka Debako alkatea, eta Azahara Dominguez aldundiko Mugikortasuneko, Turismoko eta Lurralde Antolaketako diputatua.Geoparkea Euskal Kostaldeko Geoparkea Fitur nazioarteko turismo azokan parte hartzen ari da egunotan, eta Bizkai, Araba eta Gipuzkoako gunean zein Munduko Geoparkeen Espainiako Sarearen standean “presentzia nabarmena” izaten ari dela diote ordezkariek. Hala, Fiturreko erakusleihoa Geoparkeak sortu berri duen Geoparkeko Bira produktua nazioarteko publikoari aurkezteko aprobetxatzen ari direla gehitu dute.
Gaur (urtarrilak 23) goizean egin duten aurkezpen ekitaldian Euskal Kostaldeko Geoparkeko presidente eta Zumaiako alkate Iñaki Ostolazak azpimarratu du barneratuta dutela “turismoa aldatzen” ari dela, eta horregatik bilatzen dutela bisitarien fluxuak geoparke osora zabaltzea: “Geoparkeko Bira oinarrizko piezetako bat da helburu horretan”.
Izan ere, Mugikortasuneko, Turismo eta Lurralde Antolaketako diputatu Azahara Dominguezek esan du Geoparkeko Bira bezalako ekimenei esker “turismo fluxuak modu orekatuagoan” banatzen direla lurralde osoan, “egonaldi luzeagoak erraztuz eta, beraz, aberastasuna lurraldean zehar zabalduz”. Gainera, hori guztia “jasangarritasunaren ikuspegitik” egiten dutela nabarmendu du.
Leire Barriuso Geoparkeko gerenteak, aldiz, geoturismo eskaintza zabalaren eta anitzaren baitan kokatu du produktu berria: “Kostaldearen eta barnealdearen arteko muga geografiko eta psikologikoa gainditu nahi dugu Geoparkeko Birarekin, eta flyschak erakartzen dituen bisitariak barrualdera gureganatu nahi ditugu”.
