Ondarroako Wikiemakumeok taldeak ikastaroak eskainiko ditu
Ikastaroak urtarriletik maiatzera bitartean izango dira, hilabeteko azkenengo eguaztenetan, 10:00etatik 12:00etara, Etxelilan.
Ondarroako Wikiemakumeak taldearen ikastaroa. Ondarroako Wikiemakumeak Euskarazko Wikipedian emakumeen biografiak sortzea da Wikiemakumeok proiektuaren helburua. Euskal Herriko txoko desberdinetan taldeak sortuta daude jada, eta Ondarroan ere, Artea, Dima eta Durango bezalako ereduen esperientziatik abiatuta sortu zuten taldea ekaina inguruan. Lehenengo ikastaroak urrian egin zituzten, eta orain, ikastaro gehiago eskaintzeko asmoagaz dator taldea.
“Urtarriletik maiatzera bitartean hilabeteko azkenengo eguaztenean izango dira ikastaroak, 10:00etatik 12:00etara, Etxelilan. Marisa Barrena eta Maripa Garaizabal Durangoko wikilariak arduratuko dira ikastaroak emateaz”, adierazi dute taldeko kideek. Ikastaroan izena emateko bi aukera daude; Etxelilan modu presentzialean, edo telefono bidez, hurrengo zenbakira deituta: 94 613 40 08.
Herriko emakume zein eragileen euskarazko sarrerak osatzen dabil Ondarroako Wikiemakumeak taldea, “emakumeek egindako lana ikusarazi, euskaraz ekoitzi eta euskarazko Wikipedia zabaltzeko”. Emakumeen biografia berriak sortzeaz gain, Wikipedian beste hizkuntza batzuetan dauden emakumeen biografiak euskarara ekartzea ere bada taldearen beste helburuetako bat, baita, emakumezko editore euskaldunen kopurua handitzea. Horrez gain, Euskal Wikipedian genero-ikuspegia txertatzea beharrezkoa ikusten dute, historian zehar izandako emakumeen ekarpenak eta ezagutzak Euskal Wikipedian bilduz.
Ondarroako Wikiemakumeak taldearen Wikipediako orrian ikusi daiteken bezala, askotariko lanak egin dituzte jada; izan ere, 2024an sortutako bost sarrera berri egin dituzte: Ondarroako Etxelila, Andrabanda, Garazi Etxaburu Aulestia, Naroa Garcia Ibaibarriaga eta Elena Fernandez Iturrioz. 2025ean ere lanean jarraitu dute, eta Mariziztrin Talde Feministaren eta Nahia Iparragirre Burgoa ondarrutarraren sarrerak gehitu dituzte. Sarrera hauek berriak izan arren, 2024.urtean 21 sarrera hobetu zituzten, eta beste zortzi dituzte hobetzekoen zerrendan. Momentu honetan, Nahia Gartzia Bengoetxearen eta Ondarroako emakumeen atxilotze eta espetxeratzeen inguruko sarrerak osatzen dabiltza, eta gaur gaurkoz, egiteko dauzkaten zerrendan beste 28 izen daude. Itzulpenak ere egin dituzte Ondarroako wikilariek; 2024an Maria Dolores Etxano Varelaren sarrera euskarara itzuli zuten, eta 2025ean, Monica Gagliano eta Annemie Maesen biografiak itzuli dituzte. Bestalde, egiteko daukaten itzulpenen artean Maite Albiz Dokumentazio Zentroaren sarrera dago.
Bertaratzeko deia. Ondarroako Wikilariek Wikiemakumeok proiektura hurbiltzeko deia egin die interesa duenari: “Urtarrilaren 29, otsailaren 26, martxoaren 26, apirilaren 30 eta maiatzaren 28an izango dira ikastaroak, 10:00etatik 12:00etara. Taldea ere egun horretan batzen da, eta ateak zabalik ditugu nahi duenarentzat”.
