Taupada Jardunaldiak euskaltzaletasunaren inguruan hausnartzeko bide berriak aztertuko ditu
Eguenean [urtarrilak 30] egingo dute jardunaldia, 09:30etik aurrera, Bilbao Berrikuntza Faktorian. Besteak beste, Jon Zabala Arando ikerlari amorotarrak parte hartuko du jardunaldian. Izen ematea zabalik dago.
Euskaltzaleen Mugimenduak euskaltzaleak aktibatu eta hausnarketa egiteko tartea hartuko du eguenean [urtarrilak 30], 09:30etik 14:15era, Bilbao Berrikuntza Faktorian. Taupada Jardunaldia 2001ean antolatu zuen lehenengoz Taupa Euskaltzaleen Mugimenduak, eta ordutik “ezinbesteko hitzordu” bihurtu da mugimenduko kideen formazio, elkartruke nahiz hausnarketarako. Aurtengoa, gainera, proposamen berriekin dator.
Besteak beste, euskaltzaletasunaren eta euskalgintzaren inguruan hausnartzea da jardunaldien helburua: “Euskarak euskaltzaleak behar ditu, euskararen alde egotetik harago euskararen alde eragingo duten herritarrak aktibatzea ezinbestekoa izango da euskarak aurrera egin dezan. Horretarako ordea, euskaltzaleok antolatu eta saretzeko modu eta proposamen berriak behar ditugu”. Hori horrela, goiz guztiko jardunaldia antolatu dute; bertan izango da Jon Zabala Arando ikerlari amorotarra ere.
Zabalarena izango da, hain zuzen ere, eguneko lehenengo hitzordua. Gizarte Psikologiako doktoregaia da Zabala, eta EHUko “Kultura, Kognizioa eta Emozioa” ikertaldeko kidea da. Hala, harrera eta irekiera ekitaldiaren ostean, amorotarrak Bilkura kolektiboak bizitzaren erdigunean bere tesiaren inguruan hitz egingo du. Hain zuzen ere, Durkheimen eferbeszentzia kolektiboaren teoria frogatu du Zabalak, eta besteak beste, kidetasun sentimenduen inguruan arituko da.
Ostean, irakaskuntzan murgilduko dira bertaratzen direnak. Mondragon Unibertsitateko Letizia Garcia Fernandez eta Eneritz Garro Larrañagak irakaslegaiak euskararen eragile aktibo izatearen inguruan ariko dira. Jarraian BIZI mugimenduko Xabier Harluxetek hartuko du hitza, eta klima aldaketaren eta injustizia sozialaren inguruan jardungo du.
Atsedenaldiaren ostean, EHUko Parte Hartuz Ikerketa Taldetik Igor Ahedo Gurrutxagaren txanda izango da; NItik GUra izenburupean, saretxe eredu berrien inguruan ariko da Ahedo. Jardunaldiagaz amaitzeko, mahai ingurua egingo dute, Taupa Mugimenduaren inguruan eta aktibazio ildo berriari begiratuz.
Jardunaldietan parte hartu nahi dutenek izena eman dezakete taupamugimendua.eus web orrian; edozein eragile zein norbanakoei dago zuzendua.
Egitaraua.
- 09:30. Ate irekiera eta harrera.
- 09:45. Hasiera: Irekiera ekitaldia.
- 10:00. Jon Zabala Arando.
- 10:40. Letizia Garcia Fernandez eta Eneritz Garro Larrañaga.
- 11:25. Xabier Harluxet.
- 12:00. Atsedena.
- 12:30. Igor Ahedo Gurrutxaga.
- 13:15. Mahai ingurua: Taupa Mugimendua.
- 14:15. Itxiera.
