Energia komunitatea eratzeko lehen urratsak ematen dabil Mutrikuko Udala
Energia komunitatearen aurkezpena otsailaren 4an [martitzena] izango da, Luardon, 18:00etan.
Herritarrekin batera Mutrikuko energia komunitatea eratzen dabil Mutrikuko Udala. Horren harira, aurkezpena egingo dute Luardon otsailaren 4an [martitzena], 18:00etan, eta herritar orori bertaratzeko gonbita zabaldu dio udaleko Energia Sailak.
Goiener taldeak gidatutako 10 saio egingo dira, gutxi gorabehera, eta aurreikuspenen arabera, sei hilabete inguruko iraupena izango du prozesuak. Lan-taldea osatzen dutenak bi astean behin geldituko direla zehaztu du Mutrikuko Udalak. “Saioen helburua mutrikuarrak energiaren arloan ahalduntzea izango da, aholkularitza juridiko teknikoa jasoko baitute herritarrek”.
Energia guztiona eta guztiontzat izatea da energia komunitatearen xedea: “Definizioz, energia komunitatea pertsonak, enpresa txikiak, elkarteak eta tokiko erakunde publikoak biltzen dituen erakunde juridikoa da; elkartea ala kooperatiba, normalean. Kontsumitzaile bakoitza iturri berriztagarrietatik energia kontsumitzen hastea izan ohi da mota honetako komunitateek jorratu ohi duten lehen bidea, beti ere, gertuko onura soziala, ingurumenekoa eta ekonomikoa bilatzeko. Azken finean, energia guztiona eta guztiontzat izatea”.
Mutrikuko Udalak saioetara gonbidatu ditu herritarrak: “Orain arte energiaren munduan ez dugu herritarrok esku hartzeko aukerarik izan, beraz, ez da harritzekoa komunitate energetikoaren gaia arrotza egitea. Dena den, egoera aldatzeko garaia dela uste baduzu eta eraldaketaren parte izan nahi baduzu, Luardon eskainiko diren lan saio hauetan parte hartzera animatzen zaitugu. Ea epe motzean Mutrikun sortutako energia herrian bertan kontsumitzeko aukera dugun!”.
