Lea-Artibaiko ordezkariak edukiko ditu Euskal Pilota Federazioko zuzendaritzak
Zapatuan [otsailak 1] hartuko dute zuzendaritza Pilota Zazpi Haizetara hautagaitza taldekoek. Tartean daude Aritz Erkiaga ispastertarra, Itsaso Zubizarreta markina-xemeindarra eta Oier Zearra Mutrikun bizi den pilotari ohia.
Joan den zapatuan [urtarrilak 25] egin zituzten Euskal Pilota Federazioko hauteskundeak, eta Lea-Artibaiko ordezkaritza duen taldeak irabazi du, Pilota Zazpi Haizetara hautagaitzak, hain zuzen ere. Hori horrela, Joxe Mari Mitxelena oiartzuarra izango da pilota federazioko presidente berria, 47 boto eskuratuta. Enaitz Olaeta presidente izateko aurkeztu zuen beste taldeak, Euskal Pilota Mundura Taldeak, 30 boto eskuratu zituen.
Gotzon Enbil zortzi urtez presidentea izan ostean, Mitxelenak zapatuan [otsailak 1] hartuko du agintaldia, lau urtez; orain arte federazioko diruzaina izan da. Mitxelenaren taldea beste hamahiru kidek osatuko dute, eta tartean daude lea-artibaitarrak ere. Aritz Erkiaga puntista ispastertarra izango da zesta puntako ordezkaria eta Oier Zearra Mutrikun bizi den pilotari ohia, ostera, esku pilotako ordezkaria. Markina-Xemein Esku Pilota Taldearen izenean, aldiz, Itsaso Zubizarreta ariko da.
Zubizarretak adierazi duenez, ez zuten espero hauteskundeak irabaztea: “Uste genuen aldea oso txikia izango zela, alde batera nahiz bestera, eta oso estu egongo zela hautaketa. Harriduraz jaso dugu halako aldeagaz irabaztea”. Harriduraz jaso duten arren, lanean hasteko gogoz daude Pilota Zazpi Haize taldekoak: “Guk beti esan dugu kluben kluba izan nahi dugula, eta hori indartzen oinarrietatik hasi behar gara, ez goitik”. Hori horrela, klubei entzun eta analisi bat egitea da euren lehenengotariko helburua.
Gaineratu duenez, paraleloki lan egingo dute euskal pilota selekzioaren alde: “Azken aldian hain entzutetsua izan den euskal selekzioaren onarpenari ere helduko diogu, eta sakon kolpatu beharko diogu. Datorren urtean dira lehenengo mundialak, eta hor gaitz ikusten dugu, baina, 2030era begira, ea zer egin daitekeen”.
Markina-Xemein Esku Pilota taldeari dagokionez, “erreferentea” izan nahi dutela ziurtatu du Zubizarretak: “Gu pilotaren alde lan egiteko prest gaude. Markina-Xemeingo talea nahiko osasuntsu dago, eta Euskal Herri mailan erreferentea izan nahi dugu; hemen egiten dugun lana hor islatuko da”.
