Ondarroara joan direnei ongi etorria emango die Ondarroako Udalak
Ongi etorria otsailaren 1ean [zapatua] izango da, Ondarroako Kofradia Zaharreko bigarren solairuan, 11:00etan.
Ondarroara joan direnei ongi etorria emateko saioa antolatu du udalak zapaturako [otsailak 1]; 11:00etan, Kofradia Zaharreko bigarren solairuan elkartuko dira. Iritsi berriei eskainitako ekitaldi “sinbolikoa” izango da: “Ondarroara iritsi berri direnak bizilagun gisa aitortzea da helburua, eta herritar moduan Ondarroako bizitza soziokulturalean murgiltzeko ezagutza eta transmisioa egitea”.
Saioan, herriko eragileen aurkezpena egingo zaie gonbidatuei, eta herriaren azalpen eta orientabideak emango zaizkie: “Herriko eragileekin harremana izan dezaten sustatu eta herriko bizitza egituratuan parte hartzeko gonbidapena luzatuko zaie”. Horrez gain, herriaren eta ezaugarri orokorren aurkezpena ere egingo da; herriko ohitura eta bizimoduaren berri eman, eta jatorri eta kultur aniztasunaren ideiak erdigunean jarriko dituzte, baita elkar errekonozitzearen eta elkarbizitzaren garrantzian sakondu ere. “Herriko dinamika eta egunerokoan integratu eta parte hartzeko gonbita luzatuko zaie, herritar aktiboak izatera animatuz. Horretarako, herriko elkartegintza, kultur eskaintza eta antolaketa, zein bestelako informazioa eskainiko zaizkie, espazio hauetan parte hartzeko aukera zabalduz”.
Gainera, bertaratzen direnen zalantzak argitzeko tartea irekiko dute, “giroa sortu, elkarrekin hitz egin eta esperientziak edo beharrak elkarbanatzeko”.
Jatorri aniztasuna. Aztiker ikerguneagaz elkarlanean, udalak Ondarroako jatorri aniztasuna erakusten duen web orria jarri du martxan. “Elkarbizitzaren gakoetako bat gure herria osatzen dugun pertsona, jatorri eta kultura ezberdinen arteko elkar ezagutza da. Elkar ezagutza elkarbizitzaren oinarrian lehen urratsa dela ulertzen dugu, honek elkar ulertzea baitakar atzetik, eta elkarren aitortza ondoren”.
Alde batetik, 2024an Ondarroara etorritako herritarren jatorrizko herrialdea ikusi daiteke atarian, eta beste aldetik, 2022 eta 2023 urteetako migrazio saldoa kontsultatu daiteke. “Horrez gain, Ondarroara etorritako herritarren jatorrizko 20 udalerri nagusien kontsulta ere egin daiteke, bai Euskal Herriko herrietan eta baita Euskal Herritik kanpokoena ere”.
