Mutrikuko Merkatu Txikian Biolur elkarteak Amillubi proiektua aurkeztuko du
Lehenengo aldiz egingo da Merkatu Txikia Merkatu plazan, eta herriko ekoizleek parte hartzeaz gain, Amallubi proiektua aurkeztuko du Biolur elkarteak.
Zapatuan [otsailak 8] Mutrikuko Merkatu Plaza herriko artisauen erakusleiho bilakatuko da; izan ere, bertan egingo da lehenengo aldiz Merkatu Txikia. Oraingoan, berritasunekin dator, eta artisauez gain, Biolur elkartea gonbidatu dute, bere Amillubi Taupaka proiektua aurkezteko. 10:00etan irekiko ditu ateak azokak, eta 14:00ak arte zabalik egongo da interesa dutenentzako.
Tokiko artisautzaren azoka izango da honakoa, eta Mutrikuko ekoizleek sortutako produktuak egongo dira salgai, hala nola: Iratxe Lorak, Lamiuma, Ibiri, Mikkota, Art, Xarma Poltsak, eta Ekoalboraz. Ekoizleekin batera, Institutuko ikasleek ere parte hartuko dute, “produktu gazi-gozoak eskainiz”. Antolatzaileek adierazi dutenez, giro “paregabea” egongo da azokan: “Azoka egunean zehar garatuko da, giro animatua eta dinamikoa sortuz, familia edo lagunekin gozatzeko aproposa. Aukera bikaina izango da produktu paregabeak deskubritzeko, bertako ekintzaileak laguntzeko eta Amillubi proiektua ezagutzeko”.
Nekazaritza eta abeltzaintza ekologikoa sustatu eta bultzatzen duen elkartea da Biolur, herritar eta ekoizleek osatutakoa, eta irabazi asmorik gabekoa. Helburu nagusia, elkarlan eta lankidetza desberdinak eraikiz “nekazaritza eta abeltzaintza agroekologikoa eta iraunkorraren bidez lurraren epe luzeko emankortasuna bermatzea, jendartearentzako elikagai osasuntsuak sortzea eta landa inguru eta herri bizi eta duinak” sustatzea da. Helburu honi tiraka sortu dute Amillubi Taupaka proiektua, eta zapatuan [otsailak 8] aurkeztuko dute Merkatu Txikian, 13:00etan. “Eusten gaituen lurra ondasun kolektibo bilakatzeko helburuarekin abiatu dugu Amillubi Taupaka proiektua. Herritarrek elikagaiak eta nekazariek lurrak izan ditzaten, elkarrengana batu garen mugimendu agroekologikoa gara eta lurra babestea dugu helburu”.
