'Irabazi arte!' telesailaren 4. denboraldiaren estreinaldia egongo da eskualdeko herrietan
Asteburuan Gizaburuagan, Lekeition, Markina-Xemeinen, Ondarroan, Munitibarren, Aulestin eta Etxebarrian 'Irabazi arte!' telesailaren denboraldi berriaren estreinaldia egongo da. Otsailaren 21ean Mutrikun izango dute ikusteko aukera.
2022ko otsailaren 11n estreinatu zen Irabazi arte! telesaila ETB 1en, eta ordutik, Euskal Herriko milaka neraberen barikuetako hitzordua bihurtu da. Printzesak futbol taldearen abenturak kontatzen ditu telesailak, eta laugarren denboraldia ate joka daukan arren, aurrestreinaldiagaz gozatzeko aukera egongo da otsailaren 14an, 15ean eta 16an, Gizaburuagan, Munitibarren, Ondarroan, Aulestin, Etxebarrian, Markina-Xemeinen, Lekeition eta Mutrikun, Uema eta EITBren lankidetzari esker. Sarrera guztiak doan izango dira, baina Ondarroan aurretiaz hartu beharko dira. Turismo Bulegoan daude eskuragarri, eta pertsonako gehienez lau sarrera hartu ahalko dira.
Lehenak ikusten ondarrutarrak eta aulestiarrak izango dira. Bihar [otsailak 14] ikusi ahalko dute lehenengo kapitulua, Ondarroako Kofradia Zaharrean, 18:00etan eta 19:30ean, eta Aulestiko udal areto nagusian, 18:30ean. Ondarroako Udalak adierazi duenez, 19:30ean egongo den saioko sarrera guztiak agortu dira, eta 18:00etakoak “batzuk” gelditzen dira.
Zapatuan [otsailak 15] Etxebarrian eta Lekeition egongo da estreinaldia. Etxebarrian kultur aretoan egingo dute, 18:15ean, eta Lekeition Azkue aretoan, 18:00etan. Munitibarren ere zapatuan egingo dute 18:30ean udal aretoan.
Gizaburuagan eta Markina-Xemeinen domekan [otsailak 16] izango dute telesaila ikusteko aukera. Markina-Xemeinen ere bi saio egingo dituzte, 16:30ean eta 18:00etan, kultur aretoan, eta Gizaburuagan bakarra, 18:00etan udaletxeko aretoan.
Estreinaldia ikusten azkenak mutrikuarrak izango dira. Otsailaren 21ean [barikua] izango dute hitzordua, eta kasu honetan ere bi saio egongo dira: 17:00etan eta 19:00etan. Saio bakoitzeko 80 gonbidapen daudela adierazi du udalak, beraz, mutriku.eus orrialdean edo turismo bulegoan eskuratu beharko dira sarrerak, otsailaren 17ko[astelehena] 10:00etatik aurrera.
