Martxoaren 16an egingo dute Emakume Sortzaile eta Ekintzaileen VIII. Azoka
Domekan [otsailak 16] izango da izena emateko azken eguna. Azoka 11:30etik 14:30era egingo da, Lekeitioko plazan.
Lekeitioko Udalak eta Leartibai Fundazioak zortzigarrenez antolatu dute Emakume Sortzaile eta Ekintzaileen azoka. Emakumeek egiten duten lana ikusarazi eta “presentzia eta indarra” emateko helburuagaz, Lekeitio eta inguruko emakume sortzaileentzako espazioa bihurtuko da Lekeitioko plaza martxoaren 16an; Emakumeen Nazioarteko egunaren harira antolatutako ekimena da.
Antolatzaileek jakinarazi dutenez, 24 saltoki ipintzeko aukera egongo da; euria eginez gero, plazan egin beharrean elizapean egingo dute azoka. Hala, 11:30etik 14:30era postuak ikusi eta erosteko aukera egongo da.
Domekan [otsailak 16] amaituko da azokan izena emateko epea. Parte hartzeko ezinbestekoa izango da adin nagusiko emakumea izatea, eta norbere sorkuntza eta ekintzailetza produktuak eskaintzea. Puntu gehien lortzen dituzten eskatzaileek edukiko dute postua ipintzeko aukera. Hala, eskabideak lekeitioberdintasuna@gmail.com helbidera bidali beharko dira; bete beharreko orriak eta informazio guztia Lekeitioko Udalaren web orrian argitaratu dituzte.
