Santa Katalina bideko aterpean Jose Arrueren irudia margotuko dute
Lekeitio Lagunkoia taldeko kideek auzolan ekintza egingo dute astelehenean [otsailak 17]; herritarrei bertaratzeko deia egin diete.
Lekeitio Lagunkoia taldeak auzolan ekintza bikoitza egingo du astelehenean [otsailak 17]. Bi ekintzak Santa Katalina bideko aterpean izango dira, bata 10:00etan eta bestea 17:00etan.
Goizeko ekintzari dagokionez, orma zuriz pintatuko dute, eta behar den tokietan masilla emango dute. Azaldu dutenaren arabera, gehienez bi orduko auzolan ekintza izango da.
Arratsaldeko ekintzari dagokionez, ostera, proiektora erabiliz Jose Arrue margolariak egindako Itxasgaña Txakolinaren marrazkia margotuko dute. Aterpean konponketak egin eta barrua zuriz pintatu ostean, grafiti bat agertu zela jakinarazi dute: “Ez dugu ulertzen herritar bolondresak egindako lan ederrak horrelako erantzuna izatea eta Lagunkoi taldetik egileari eskatu nahi diogu errespetatzeko herriko ondarea”. Arrueren irudia grafitiaren alboan margotzea erabaki dute.
Gaineratu dutenez, Lekeitioko Udalak ipiniko du auzolan ekintza aurrera eroateko beharrezkoa den materiala. Hala, herritarrei laguntzera joateko deia luzatu diete: “Gure asmoa datorren aste amaierarako astelehenean hasiko dugun lana amaitzea da”.
