Bekobentaren 50. urteurrena gogoratzeko zuhaitza landatu dute
50. urteurrenean murgilduta daude Markina-Xemeingo Bekobentako ikasle, irakasle, langile nahiz guraso denak. Hainbat ekintza dituzte martxan, txapelketak tarteko, eta beste hainbat dituzte aurretik oraindik ere. Barikuan [otsailak 14] 50 urte loran leloa gorpuzten duen ekitaldia eroan zuten aurrera. Izan ere, eskolatik igarotakoak gogoratu nahiz datozenek sustraiak gogoratu ditzaten, zuhaitz bat landatu zuten eskolako eremuan.
11:00etan elkartu ziren jolastokian, eta LH 4. mailako ikasleek eman zieten hasiera ekitaldiari. Jarraian, LH 5 eta 6. mailakoek hartu zuten hitza, eta bertso bana abestu zuten. Hala, hasierako agurrak eginda, zuhaitza landatu zuten denen artean. Ekitaldiagaz amaitzeko Txoriak txori abestia abestu zuten, Rakel Pujana trikitilariaren eta Gorka Txakartegi gitarra jotzailearen laguntzagaz.
