Klima aldaketari eta energia trantsizioari buruzko ekintza plana osatzen dabil Mutrikuko Udala
Ekintza plana osatzeko herritarrei zuzendutako galdetegia eskuragarri jarri du. Galdetegia betetzeko epea otsailaren 21ean [barikua] amaituko da.
2024ko apirilean abiatu zuen Mutrikuko Udalak energia trantsizioak eta klima aldaketak dakartzan erronkei erantzuteko Mutriku, herri bizigarri prozesua. Herriaren errealitatearekin bat etorriko den 2030. urtera begirako plana da honakoa, eta lehen pauso bezala energia eta klima aldaketari buruzko Mutrikuko diagnostikoa egin ondoren, orain, herritarrei zuzendutako online galdetegia jarri dute eskuragarri mutriku.eus webgunean. Herritarrek otsailaren 21era [barikua] arte izango dute galdetegia erantzuteko aukera.
“Lehen urratsa herriko egoeraren abiapuntuko egoera zein den ezagutzea izan da, eta horren emaitza Energia eta klima aldaketari buruzko Mutrikuko diagnostikoa izeneko dokumentua da. Diagnostikoa lantzeko garaian udalerriko sektore ezberdinei zuzendutako elkarrizketak ere egin ziren eta herritarrak sentsibilizatzeko asmoz, podcast ezberdinak ere entzungai daude”, zehaztu du Mutrikuko Udalak.
2030 urtera begirako ekintza plana osatzen ari da une honetan udala, eta honetarako, “ezinbestekoa” ikusi du herritarren ikuspuntua txertatzea. Beraz, herritarrei zuzendutako online galdetegian parte hartzeko gonbita luzatu die, guztien artean diseinatzeko 2030era begirako helburuak, eta hauek barnebilduko dituen plana. Prozesu osoaren inguruko dokumentuak mutriku.eus webgunean aurkitu daitezke.
