Pantera arrosak, zesta-puntaren oihaneko nagusi
Aritz Erkiagak eta Ion Ibarluzeak Eusko Label Winter Series txapelketa irabazi dute bigarrenez jarraian, finalean Ludovic Ladutxe eta Mikel Mantzisidor 2 eta 0 menperatuta. Ispastertarraren hirugarren txapela da, eta markina-xemeindarraren bigarrena.
Argazkia: Eraman Jai Alai. Aurreikuspenak bete egin dira. Hautagaik ez dute hutsik egin. Aritz Erkiaga eta Ion Ibarluzea, bigarren urtez jarraian, Eusko Label Winter Series txapelketako txapeldunak dira. Ispastertarra eta markina-xemeindarra lehiaketan txapel bi lortu dituzten bakarrak dira. Bigarren urtez, bikoterik sendoena, fidagarriena eta indartsuena osatu dute txapelketaren laugarren ekitaldian. Atzo [otsailak 16], nagusi agertu ziren Ludovic Ladutxe getariarrak eta Mikel Mantzisidor mutrikuarrak osatutako bikote urdinaren kontrako finalean, gazteak faboritoei ezustekoa ematen gogotik saiatu arren. Erkiaga eta Ibarluzea 2 eta 0 gailendu ziren, Jai Alai katedralaren harmailak sutan ipini zituzten ikusleen aurrean.
Bi dira larrosen nagusitasuna justifikatzen duten kausak: alde batetik, Erkiagak jokaldiak biribiltzeko duen abilezia; egungo puntistarik trebeena dela frogatu zuen, beste behin, final handian. Bestetik, Ibarluzeak atzealdeko koadroetan egindako kalitate eta konfiantza jauzia. Hain zuzen ere, markina-xemeidarrak, egoera gaitzak aurrez aurre edukita ere, ez du egun txarrik eduki Winter Series honetan: egonkortuta azaldu da, dominantziaz, segurtasun handiz. Jauzia egin duten beste bi puntistak Ladutxe eta Mantzisidor dira, biak ala biak merezimendu osoz sailkatu baitira finalera.
Argazkia: Eraman Jai Alai.
Tentsioa, lehen tantotik.
Pilotak estreinakoz pareta ukitu zuenetik, urduritasuna gailendu ze bikote bien jokoetan, batez ere, kantxaren aurrealdean; Erkiagak eta Ladutxek hutsegiteak egin zituzten partidu hasieran. Larrosek 3 eta 1eko lehen errenta eskuratu zuten, baina Mantzisidor arduratu zen hirura berdintzeaz. Ostean, urdinek 3 eta 4koa lortu zuten, baina Erkiagak atzera berdindu zuen, launa. 6 eta 4koan, ispastertarraren lehen maisulana ailegatu zen: zortziko koadrotik, alboz, nahieran egin zuen tantoa. 8 eta 5ekoagaz iritsi ziren atsedenaldira. Arnas apur bat hartuta, txik-txakera ezarri zuen 9 eta 6koa. Zalantzen Txokoak urdinen kontrara egin zuen, mutrikuarraren bote bat antzeman baitzuen errepikapenak.
Une batez, 10 eta 7kora iristean, bazirudien bikote larrosak partiduari neurria hartua ziola. Baina ez. Urdinek beren larrua ez zuten inondik inora merke saldu gura: 10 eta 0ra hurreratu ziren lehenik; 11 eta 9ra, ondoren. Pilota atzera jaurti zuten, hamarreko koadro gainetik, Erkiagak erreboteetara behartuta sar zedin eta gero aurrean amaitzeko. Setaren amaieran, getariar aurrelariak bere xisteraren uztaia puskatu zuen; aldaketa egitea pentsatu zuen lehenengo, baina gerora kargutu zen, apurtuta egonagatik ere, hasieran ateratakoarekin aurrera egitea posible zela. Posible izango ez zena, baina, seta poltsikoratzea da. Erkiagak eskumaz egindako horma biko eder batekin patrikaratu zuen lehen txanpa: 15 eta 10.
Bigarrenaren hasierak lehendabizikoaren amaieraren zantzuak eduki zituen: larrosak koska bat gorago zeuden, baina urdinak ez ziren ezelan ere amore emateko prest. Markagailuak, ondorioz, ez zuen bikote bietako baten alde egin: 0 eta 1, 1 eta 1, 3 eta 2, 3 eta 3 edota 3 eta 4 dantzan egin zuen, tantoak banan-banan egin ahala. Ladutxek lehen setean baino arazo agerikoagoak eduki zituen sakeetan. Erkiagak, aldiz, gogotik sufritu zuen erreboteetara sartzeko, eta arazo haiek probestu zituen urdinek, aurrean petrolio ateratzeko. Hain zuzen 4 eta 6 aurretik joatera iritsi ziren, baina, konturatzerako, larrosek egoera errotik irauli zuten: 8 eta 6ko markagailuarekin iritsi ziren atsedenaldira.
Argazkia: Eraman Jai Alai.
Beteranoaren bizkarra.
Helburu handia lortzeko, hautagaiek beren jokorik onena kantxaratu beharra zuten, gehienbat, lapurtarraren ekina tarteko. Ladutxek pilota zailak harrapatu zituen ezker paretan, eta errebeskada ederrez erasora jo. Lan hark, baina, ez zuen isla argi eta garbirik markagailuan, Lea-Artibaiko bikotea beti tanto pare bat gorago baitzihoan: 11 eta 10, 12 eta 10, 13 eta 10, 13 eta 11. Finala gelditu zen arte. Erkiagak aldageletarako bidea hartu zuen, lepoan uzkurdura bat igarrita. Minutu batzuen buruan itzuli zen frontoira. Zalantzek finala hartu zuten, lehen tantoan nabarmen etsita agertu zela ikusita. Ondorengo bietan, ostera, ez zuen barkatu: 14 eta 12koa lehenik, 15 eta 12koa azkenean. Sufrituta, baina Erkiaga eta Ibarluzea berriro txapeldun ziren.
Aritz Erkiaga: “Aurrean ondo agertzeko, atzean lan handia egin beharra dago”
Aurpegi txarra edukita ere, ispastertar izarrak “ondo zegoela” azaldu zuen, jokoa amaitu bezain pronto. Txapelketako pilotaririk onenaren saria lortu arren, nabarmendu zuen garaipena “taldelanaren emaitza” dela: “Aurrean ondo agertzeko, atzean lan handia egin beharra dago”. Ibarluzeak, bere aldetik, “partiduz partidu joatearen garrantzia” azpimarratu du: “Txapeketaren hasieratik, bagenekien neurketa denetan lan egitea tokatuko zitzaigula, eta halaxe egin dugu. Gaurkoan, lehen setean gutxi gorabehera lasai aritu ahal izan gara, areriek normalean egin ohi ez dituzten akatsak egin dituzte eta. Bigarrenean, baina, dena ematea beste aukerarik ez zuten, eta estuago hartu gaituzte”.
Mikel Mantzisidor: “Ideiak argi eduki ditugu uneoro, baina aurkariek eduki dituzten aukerak asmatu egin dituzte, eta guk, aldiz, zenbait akats egin”
“Hunkituta” agertu zen Mantzisidor mutrikuarra: “Ideiak argi eduki ditugu uneoro, baina aurkariek eduki dituzten aukerak asmatu egin dituzte, eta guk, aldiz, zenbait akats egin”. Partidu osoan gogoz kontra zeudela zirudien arren, markagailuan ez ziren oso atzean galdu urdinak: “Arerioak deseroso aritu dira, ez dizkiegu gauzak erraz utzi; hurrengoan, txapelaren bila joango gara”. Finalari bere osotasunean erreparatuta, “irakurketa ona” egin zuen atzelariak. Ez, ostera, bere bikotekideak. Ladutxeren ustez, ez uten “partidu ona” egin: “Erkiaga partidutik atera guran, hutsegite asko egin ditugu, eta presioa ere igarri dugu geure lehen finalean”. Denetariko arazoei aurre egin ostean, zesta apurtzeak “burua partidutik atera” zion getariarrari: “Dena dela, ez dut hori justifikaziotzat baliatu gura”.
Ion Ibarluzea: “Txapelketaren hasieratik, bagenekien neurketa denetan lan egitea tokatuko zitzaigula, eta halaxe egin dugu”
Ozeanoaren bestaldera.
Azken garaipen horrekin, Erkiagak eta Ibarluzeak Jai Alai Ligaren lidergoa sendotu dute: 2.900 puntuko uzta dute bildua. Ladutxek eta Mantzisidorrek, aldiz, 2.100 puntu dituzte; Thomas Urrutiak eta Thibault Basquek, 1840 puntu; Eñaut Urreistik eta Gorka Sorozabalek, 1.830 puntu; bai Johan Sorozabalek eta Unai Lekerikabeaskoak, bai Xabier Barandikak eta Imanol Lopezek, 750 puntu; azkenik, hala Jean Dominique Olharanek eta Jon Bullet Zabalak, nola Alex Goitiak eta Julen Del Riok 540 puntu dituzte. Liga, baina, ez dago amaituta. Izan ere, Daniara (AEB) lekualdatuko da zesta-puntaren fokua, hilaren 20tik 22ra bitartean Biscayne Cup txapelketa jokatuko baitute bertan. Erkiagak eta Mantzisidorrek gaur bertan [otsailak 17] bidaia egiteko asmoa dute. Beste hainbat, berriz, jadanik joan dira Ameriketara.
