Zapatuan Ondarroan atxilotu zuten gizona aske utzi dute
Ertzaintzak 30 urteko gizon bat atxilotu zuen zapatu goizaldean Ondarroan, armak legez kanpo edukitzeagatik.
30 urteko gizon bat atxilotu zuen Ertzaintzak zapatuan [otsailak 15] Ondarroako Kamiñazpi auzoan, goizaldeko 03:22ean, armak legez kanpo edukitzeagatik. Ertzaintzak herriko bizilagun bat gelditu zuen goizaldean, eta 09mm kalibreko arma bat aurkitu eta atxilotu egin zuen, munizioa aldatuta zuen pistola konfiskatu ondoren.
Armak legez kanpo edukitzaren ustezko delitu batengatik atxilotu zuen Ertzaintzak ondarrutarra, eta ondoren, ertzain etxera eraman zuten. Zapatu arratsaldean epailearen aurrera eraman zuten atxilotua, eta aske gelditu zen.
Ertzaintzak adierazi duenez, Ondarroako ertzain etxeko agenteek egindako operatibo baten barruan atxilotu dute: “Bariku arratsaldean hasi zen operatiboa, ondarearen aurkako delituengatik aurrekariak zituzten pertsonak delitu ekintza berriak prestatzen ari zirelakoan”.
