Felix Beristain Amallobieta margolaria zendu da
Felix Beristain Amallobietak 30 urte inguru zeramatzan Sarrian bizitzen. Margolariak lehen garaietan kostrunbrismoa landu bazuen ere, poskubismoa, abstrakzioa eta hiperrealismoa ere bere egin zituen.
Felix Beristain Amallobieta.JEGB. Felix Beristain Amallobieta margolaria zendu da gaur goizean, 87 urte zituela. Ondarrutarra bazen ere, Arabako Sarria herrian bizi zen, duela 30 urte ingurutik. Bizi osoa margotzen igaro ondoren, munduko txoko desberdinetan banaturik daude bere lanak. Izan ere, 17 urterekin egin zuen lehen erakusketa Beristainek, Eibarren, eta hastapenetan, Valentin de Zubiaurreren aholkuak jaso zituen. Ondoren, Bilbon, Akizen, Pauen, Tolosan, Alemanian, Bordelen, AEBn eta beste hainbat tokitan ere erakutsi zituen bere lanak.
Kostrunbrismoa izan zen margolari bezala lehenengo landu zuena. Gerora, poskubismoa, abstrakzioa eta hiperrealismoa ere landu zituen. Arrantzaleen bizimodua islatzen zituen zenbait lan ere egin zituen, esaterako, Ondarroako Kofradian dagoen horma irudia, 1968an egina.
2024ko uztailean, Felix Beristain Amallobieta, azken euskal kostrunbrista dokumentala aurkeztu zuten Eloy Gonzalez Gavilanek eta Jose Emilio Gomez Bustok. Bertan, margolariaren egunerokotasuna islatu, eta urte guztietan zehar egindako lana erakutsi nahi izan zuten bi zuzendariek, 70 urteren ondoren, margolaritza motortzat baitzeukan Beristainek.
Ondarroako Udalak herria eta herritarrak gehien margotu zituen margolaria izan dela aitortu du, eta doluminak eman dizkio etxeko eta lagunei: “Doluminak eta besarkada estu bana etxeko eta lagunei, udalaren eta herriaren izenean. Lurrak goxo har zaitzala, Felix“.
