Gaizka Laka eta Unai Jaio izan dira Surf eta Bodyboard Txapelketako irabazleak
V. Karras Fighters txapelketa antolatu du Artzabal Surf Elkarteak; 60 parte hartzaile baino gehiago eduki ditu txapelketak.
Eguraldi ona lagun, joan den zapatuan [otsailak 15], Lekeitioko Artzabal Surf Elkartearen ekimenez, V. Karras Fighters Surf eta Bodyboard Txapelketa lehiatu zen Karraspion. Eguraldia “oso-oso ona” izan bazen ere, olatuak ez ziren “espero bezain handiak” izan: “Metro erdiko olatuak justu-justu eduki genituen, baina posible izan zen txapelketa aurrera eroatea”.
Guztira 60 partaide inguru egon ziren, 30na kategoria bakoitzean. Bodyboard txapelketari dagokionez, Unai Jaiok irabazi zuen; atzetik geratu ziren Aitor Etxeberria, Peio Elordi eta Iker Olibares, hurrenez hurren. Surf txapelketa, ostera, Gaizka Lakak irabazi zuen. Xabier Agirre, Jon Agirre eta Alain Kortaberria geratu ziren hurrengo postuetan.
Olatuak egokienak izan ez arren, balorazio positiboa egin dute antolatzaileek: “Iragarrita zeuden olaturik egon ez bazen ere, oso balorazio positiboa egin dugu. Olatuez gain, lagun giroa egon zen, eta eguraldi ederrak asko lagundu zuen eguna ondo irteteko. Jende asko bertaratu zen”.
