Goxua Txapelketa "martxa onean" doa
Zortzigarren jardunaldian bi partida utzi behar izan dituzte bertan behera, lesioen ondorioz. Bederatzigarren jardunaldia eguenean [otsailak 20] hasiko da.
Goxua Txapelketako zortzigarren jardunaldian ere, bi partida bertan behera utzi behar izan dituzte. Markina-Xemein Esku Pilota taldekoek azaldu dutenez, lesioak izan dira partidak bertan behera uztearen arrazoia. Hala ere, txapelketa “martxa onean” doala adierazi dute; zortzigarren jardunaldia amaitu berritan, eguenean [otsailak 20] emango diete hasiera bederatzigarrenari.
Joan den astean jokatu zituzten partidei dagokienez, barikuan [otsailak 14] hiru partida jokatu zituzten. Esnaola eta Mujika nagusi izan ziren Berasaluzeren eta Isasiren aurka, 18 eta 8 irabazita. Muñozguren-Kato eta Onagoitia-Urizar bikoteen partida antzeko bidetik joan zen; lehenengoek 18 eta 9 irabazi zuten. Azken partida, ostera, apur bat orekatuago egon zen: Bustinduik eta Ezpeletak irabazi zieten Lakari eta Arrateri, 18 eta 13.
Zapatuan [otsailak 15], aldiz, Arrieta anaiek jokatu zuten Igor Jaioren eta Aitxuluaren aurka, eta 18-7 irabazi zuten. Jarraian, Adorrixa eta Gandixa neurtu ziren Andoniren eta Jokinen aurka, eta garaipena lortu zuten (18-11).
Asteko azken partida Peio Etxebarrieta-Aner Arriola eta Lorenzo-Agirregomezkorta bikoteen artekoa izan zen; bigarrenak izan ziren frontoiaren jaun eta jabe, 18 eta 5 irabazita.
Bederatzigarrena. Zortzi partida ikusteko aukera egongo da eguenetik [otsailak 20] domekara [otsailak 23], bederatzigarren jardunaldiaren baitan.
- Eguena, 19:45ean.
- Muñozguren-Katoeta Perran anaiak.
- Gorostizaga-Arandia eta Uriguen-Azurmendi.
- Andoni-Jokin eta Anitua-Basterretxea.
- Barikua, 19:00etan.
- Zugadi-Gorosabel eta Unai Uzuriaga-Xabat Uzuriaga.
- Xabi Arteaga-Koldobika Puente eta Onagoitia-Urizar.
- Anso-Legarra eta Varela-Unanue.
- Aldape-Aranburu eta Txirloi-Allenda.
- Domeka, 18:00etan.
- Berasaluze-Isasi eta Zubiria-Gomez.
