Lander eta Foster bikotea finalaurrekoetara sailkatu da
Beteranoen Trinkete Txapelketako laugarren jardunaldia jokatu dute pilotariek. Landerrek eta Fosterrek jokatutako hiru partidak irabazi dituzte, eta beraz, finalaurrekoetara sailkatu den lehenengo bikotea izan da.
Beteranoen Trinkete Txapelketako laugarren jardunaldia jokatu zuten domekan [otsailak 16] pilotariek. Pilotari batzuek jokatu ezin izan zuten arren, ordezkoek bete zuten euren tokia. Hala, Lander-Aitzol eta Martxel-Egaña bikoteek jokatu zuten lehenengo, eta Mendez-Ibon eta Jaunarena-Astigarragak, ostean.
Lehenengo partidari dagokionez, Egañak Izeitxoren partez jokatu zuen, eta Aitzolek, aldiz, Fosterrena. Aitzolek Fosterren tokia “ondo” bete zuen, eta lortutako emaitzan islatu zen: Lander eta Aitzol kantxako nagusi izan ziren, 30 eta 19 irabazita. Era berean, Lander ere ezin hobeto ibili zen: “Landerrez sakez hamar tanto lortu zituen, eta bere eskutik ikusi genituen partidako jokaldirik onenak”. Egindako lanak bere fruituak eman ditu, eta jokatu dituzte hiru partidak irabazita, Lander eta Foster dira finalaurrekoetara sailkatutako lehenengoak.
Hala, partida hasterako lekeitiarrak 3 eta huts zihoazen arren, segituan erreakzionatu zuten Martxelek eta Egañak, eta 3-3 ipintzea lortu zuten. Hala ere, Landerrek teilatua “ondo” erabili zuen, eta Martxelek txapara botatako piloten ondorioz, 10 eta 4 ipini zuten markagailua, lekeitiarren alde. Handik aurrera, Martxelek eta Egañak hurbiltzeko saiakera egin zuten arren, ez zuten lortu: “Landerrek sakea baliatuz 21 eta 12 ipintzea lortu zuen, partida nabarmen aurreratuz. Martxelek hamahirugarren tantoa eskuman moztuta lortu zuten. Aurrerago Landerrek txapara botata 21-17 ipini zen markagailua”. Egañak Izeitxoren tokia “ondo” bete bazuen ere, ezin izan zuen Landerren jokoa gainditu.
Bigarren partida ere antzeko bidetik joan zen: Mendez eta Ibon lekeitiar gazteek jokatu zuten Jaunarenaren (Gartzaron) eta Astigarragaren (Deba) aurka, eta herritarrek lortu zuten garaipena, 30 eta 17 irabazita. Partida “polita” izan zela aitortu dute antolatzaileek: “71 urteko Astigarraga eta 17 urteko Ibon elkarren aurka ikustea polita izan zen”.
Partida orekatuta hasi bazen ere (3-3), Mendezek sakea baliatuz markagailua 11 eta 4 ipintzea lortu zuen. Hori beteranoen pizgarri izan zen, eta 12-10 hurbiltzea lortu zuten. Hala ere, Mendezek abiaduraz jokatu zuen, eta ez zion Jaunarenari bere jokoa egiten utzi; 29 eta 15 ipini zuten margailua. Beteranoek markagailua iraultzeko ahalegina egin bazuten ere, ezin izan zuten: “Gazteen pauso ederra eman dute finalaurrekoetara sailkatzeko. Beteranoek, ostera, datorren domekan [otsailak 23] irabazi beharra dute txapelketatik kanpo ez geratzeko”.
Mendez-Ibon eta Jaunarena-Astigarraga.Akarregi Pilota Elkartea
Partida erabakigarriak. Gero eta gertuago dago finalaurrekoetako fasea. Domekan [otsailak 23] jokatuko dute pilotariek bosgarren jardunaldia; partida erabakigarriak dituzte aurretik partaideek. Hala, 10:00etan emango diete hasiera jardunaldiari Mendez-Ibon eta Izeitxo-Martxel bikoteek: “Hauek txapelketako bikote gazteak dira. Nahiz eta Izeitxo eta Martxel anaiak faboritoak izan, joko bizkor eta alaia ikusteko aukera edukiko dugu”. 11:00etan, ostera, Rober-Egaña eta Jaunarena-Etxezarraga bikoteek jokatuko dute: “Rober bergararrak eta Egaña mendaroarrak ez dizkiete erraz utziko gauzak, ze, ondo dabiz eta finalera heltzeko faboritoak dira. Jaunarenak eta Etxezarragak bai ala bai irabazi behar dute txapelketak aurrera jarraitzeko”.
