Mutrikuko Udalak Merkatu Plazako bi salmenta postu lizitatuko ditu
Mutrikuko erregistro elektronikoaren bidez aurkeztu beharko dira proposamenak, otsailaren 28a [barikua] baino lehen.
2024an Mutrikuko Merkatu plaza berritu zutenetik, herritarren “topaleku” bihurtu da. Izan ere, udalerriaren erdigunean kokatzen da merkatua, eta herritarrak alde batetik bestera ibiltzen dira erosketak egiten dituzten bitartean. “Hirigune historikoaren bihotz-bihotzean kokatzen da, eta 2024. urtean berritu zenetik, herritar guztientzako gune erakargarri bat da, herriaren erdigunean kokatuta dagoena, eta denentzako topalekua dena. Egindako lanekin, espazioaren energia-eraginkortasuna, erosotasuna eta irisgarritasuna hobetzea lortu da, bai bertan lan egiten duten pertsonen lan baldintzen onurarako, eta baita, erostera etortzen diren kontsumitzaileentzako ere”.
Guztira, sei postu finko ditu plazak, eta horietatik lau beteta dauden arren, gainerako bi salmenta postu finkoak lizitatuko ditu Mutrikuko Udalak. “Gaur egun Itxasne fruta dendak, Perras arrandegiak, Goxart gozotegi-kafetegiak eta Iratxe lora dendak dira postu finkoetan daudenak. Bi postu libreei dagokienez, otsailaren 13an iragarki bat argitaratu zen Gipuzkoako Aldizkari Ofizialean, postuen esleipenerako baldintzak argitaratuz”. Mutrikuko erregistro elektronikoaren bidez aurkeztu beharko dira proposamenak, eta epea otsailaren 28an [barikua] amaituko da.
Hirugarren eta bosgarren postua lizitatuko ditu udalak. Lehenengoak, 22,47 metro karratuko azalera erabilgarria du, eta bigarrenak, 22,02 metro karratukoa. Behin esleituta 10 urterako izango da, eta beste 10 urtera luzatzeko aukera izango du emakidadunak. Baldintza ekonomikoei dagokienez, lizitaziorako oinarrizko kanona 600 eurokoa izango den arren, lizitatzaileek prezioa hobetu dezakete egindako eskaintzan. Horrez gain, emakidadunak jabari publikoko ondarearen erabilera pribatiboagatiko tasa ordaindu beharko du: “Tasa hori urtero eguneratzen da. 2024koa 3,43€ metro karratuko izan da”.
Postua esleitzeko orduan, irizpide desberdinak hartuko dira kontuan: “Proposamen ekonomikoa; aurkeztutako proiektua; lizitatzailearen egoera soziala, familiakoa, ekonomikoa eta lanekoa; enplegua sortzea eta autoenpleguaren sustapena; eta euskararen jakite maila hartuko dira kontuan”. Gainera, indarrean dagoen ordenantzaren arabera, jarraian zehaztutako salmenta postu motak jarri daitezke Mutrikuko Merkatu Plazan: “Arrandegia, itsaskitegia, harategi, urdaitegia, fruta denda, barazki denda, okindegia, gozotegia, kafetegia, lore denda, eta aurretiaz aipatutako jarduerekin bateragarriak izan daitezkeen beste erabilera batzuk”. Informazio gehiago mutriku.eus webgunean jarri dute eskuragarri.
