Emakumeak izango dira protagonista karmeldarren aretoan
'Emakumeak 1931-1939' argazki erakusketa aurkeztuko dute Larrabetzu Oroimena taldeak eta Ahaztuen Oroimena Elkarteak, barikuan [otsailak 28], 19:00etan.
Alberto Unamuno, Ahaztuen Oroimena Elkarteko arduraduna, azalpenak ematen Larrabetzu Oroimena taldeak eta Ahaztuen Oroimena Elkarteak Emakumeak 1931-1939 argazki erakusketa antolatu dute karmeldarren aretoan. Erakusketaren aurkezpena egingo dute barikuan [otsailak 28], 19:00etan, karmeldarren aretoan bertan.
Martxoaren 15era arte egongo da ikusgai, eguen eta barikuetan 18:00etatik 20:00etara eta zapatu eta domeketan 12:00etatik 14:00etara. Domekan [martxoak 2], inauteriengatik, ez da zabalik egongo. Horrez gain, herriko ikastetxeekin eta jubilatuen elkarteagaz bisita gidatuak egiteko aukera aztertzen ari dira. Garaiotan entzuten zen Bilboko irrati batek girotuko du erakusketa.
Martxoaren 8ko Emakumeen Egunaren harira antolatu nahi izan dute orain erakusketa. Hain zuzen ere, azaldu dutenez, Mugimendu Feministak faxismoaren aurkako lanean ere oinarritu nahi izan dute M8a eta erakusketan milizianen edota La Pasionariaren inguruko informazioa dago. “Erakusketarako aukeratutako argazkiekin emakumeak protagonista nagusi izan ziren garai historiko honetako memoriaren zati hori berreraikitzen saiatu gara, modu zatikatuen bada ere”.
Errepublika garaian askatasun eta eskubide asko lortu zituzten emakumeek, boto eskubidea edota Dibortzioaren Legea, besteak beste. Eskuratu berri ziren eskubideen babesean, emakumeak ordura arte kanpoan egon ziren espazioetan agertzen hasi ziren, eta, ondorioz, “hautsi egin zen tradizio zaharrek eta aurreiritzi sekularrek babestutako emakume prototipoa”. Diktadura frankistak, ordea, aurrerapenak baliogabetu zituen eta “berriro ama eta emazte rola” betetzera behartu.
“Emakumeak protagonista nagusi izan ziren garai historiko honetako memoriaren zati hori berreraikitzen saiatu gara”
Bide hori erakusten duten 53 panel jarri dituzte karmeldarren aretoan. Horietako sei Ahaztuen Oroimenak jarri ditu, “Markina-Xemeingo zein Lea-Artibaiko gerra garaiko argazkiak agertzen dira”. Bereziki bi panel nabarmendu dituzte, duela hilabete inguru aurkitutakoak eta lehen aldiz ikusgai jarriko dituztenak. Panel batean ERRI eta Mujeres aldizkarietan aurkitu dituzten argazkiak ipiniko dituzte, herriko nahiz eskualdeko erreferentziak dituen argazkiekin. Bigarrena, Arizmendi Torre baserriko argazki bat da, gerra garaian baserrietako bizimodua zelakoa zen erakusten duena.
Ahaztuen Oroimena taldetik nabarmendu dute 2004tik dauela lanean, informazioa eta batez ere testigantzak jasotzen: “Gaur egun errazagoa da, baina lehen benetan zaila zen batzuetan eta Memoria Historikoaren Zentro Dokumentala edota Euskadiko Artxibo Historikoa bezalako iturri bibliografiko espezifikoetara jo behar genuen”.
