Mutrikuko Gaztetxe Eguna antolatzeko lehenengoko bilera irekia deitu du gazte asanbladak
Bihar [otsailak 28] egingo dute Gaztetxe Eguna antolatzeko lehenengo asanblada irekia Mutrikuko Gaztetxean.
Mutrikuko Gazte Asanbladak bigarrenez antolatuko du Gaztetxe Eguna apirilaren 12an [zapatua], herriko gazteak elkartu, eta gaztetxeari zentralitatea emateko helburuagaz. Horretarako, bilera irekia egingo dute bihar [barikua], 18:30ean Mutrikuko Gaztetxean: “Bihar hasiko gara egunari forma ematen. Asmoa, agertzen garen gazteon artean eguna bera diseinatzea da. Herriko gazteak elkartzeko gune bat sortzea da egunaren xedea, eta antolakuntzan zenbat eta jende gehiago egon, orduan eta aberatsagoa izango da egitaraua. Horrez gain, gaztetxeari zentralitatea eman nahi diogu, denon espazioa dela mahaigaineratu, eta herriko gazteek bertan egin dezaketen ekarpena erdigunean jarriz”, adierazi dute Mutrikuko Gazte Asanbladako kideek.
Pasa den urtean egun guztiko egitaraua antolatu zuten, eta aurten ere asmo bera dute, nahiz eta biharko bileran adostuko duten formatua. “Txupinazoarekin eman genion hasiera egunari, olinpiadekin jarraitu, eta bazkaria egin genuen gaztetxean. Arratsaldean jarraitu zuen egitarauak: kontzertua, txaranga, karaokea… Aurten ere egun guztiko egitaraua antolatzea da asmoa, baina hori, biharko asanbladan zehaztuko dugu. Bertan erabakiko dugu noiz izango den hurrengo bilera”. Mutrikuko Gazte Asanbladako kideek bilerara joateko gonbita luzatu die herriko gazteei, eguna “denen” artean antolatzeko.
Martxoko egitaraua. Mutrikuko Gazte Asanbladak biharko bilera irekiarekin emango dio hasiera martxoko egitarau “borobilari”. Izan ere, hilabetean zehar, “denetarik” egiteko aukera izango dute gaztetxean. “Zapatuan [martxoak 1], inauteriak direla aprobetxatuta, irekita egongo da gaztetxean eta karaokea egongo da; martxoaren 5ean [eguaztena], martxoaren 8ra begirako hitzaldia antolatu dugu, 18:00etan; martxoaren 14an [barikua], irakurle taldearen hirugarren saioa egongo da, 19:00etan, eta Nanni Balestriniren Los invisibles liburua landuko dugu; martxoaren 15ean [zapatua], 12:00etan, gitarra saioa egongo da, eta iluntzean, Gaztetxea bertsotan egitasmoa izango dugu; martxoaren 21ean [barikua] Defentsa komunitatearen eskutik okupazioaren egungo testuinguru politikoa landuko duen hitzaldia egongo da, 18:30ean; martxoaren 28an [barikua], 18:00etan, Ahoztar Zelaietak La Ertzaintza que viene liburua aurkeztuko du, eta martxoaren 29an [zapatua] gitarra saioa izango dugu berriro, 12:00etan”. Ekimen guztiak gaztetxean izango direla zehaztu dute antolatzaileek, eta aipatu dutenez, sare sozialetatik emango dute egitarau guztiaren berri.
