Jose Arrueren margolana, Santa Katalinarako bidean
Lagunkoi taldeak bere margolan baten erreprodukzioa egin du; eguenean egingo dute inaugurazioa. Gainera, koadro originala ikusteko aukera ere egongo da: "Originala ikusteko aukera bakarra izango da, etxe pribatu batean dago-eta".
Azken asteetan Lekeitioko Lagunkoi taldeak antolatuta lan eta lan aritu dira hainbat herritar Santa Katalinako bide zaharreko aterpetxea txukundu eta egoki ipintzen. Auzolanean aritu dira Lekitto Bedarragaz batera, eta heldu zaie egindako lana herriari erakusteko ordua: eguenean [martxoak 6] 18:00etan ipini dute hitzordua.
2024ko abenduan aterpea garbitu eta hormak margotu zituzten. Urtarrilean, ostera, teilatuko eta atzeko aldeko untzaorriak kendu zituzten, eta otsailean Jose Arrue margolariak 1920ko hamarkadan margotutako lana erreproduzitu zuten aterpeko horman: “Jose Arruek Fausto Ibañez de Aldekoa txakolindegi famatuari publizitaterako egindako margolana da”. Halaber, eguenean Lagunkoi taldea zer den eta zer egiten duten azaltzeaz gain, egindako margolanak eta txakolinak herrian izan zuen garrantzia azalduko dute.
Lagunkoi taldeko kideek herritarrei nahiz inguruko biztanleei inauguraziora bertaratzeko gonbidapena luzatu diete: “Polita izan daiteke ibilaldi bat egin bitartean Santa Katalinara joan eta horman margotutakoa ikustera. Gero, abantaila modura, koadro originala ikusteko aukera egongo da; aukera bakarra izango da, ze, ez dago museo batean, etxe pribatu batean baizik”. Gonbidapena herritarrei luzatzeaz gain, eskualdeko Lagunkoi talde guztiei ere bertaratzeko deia luzatu diete.
Lanean aritu den lantaldea.Lekeitio Lagunkoia
