Aurrera Kirol Elkarteak barkamena eskatu du zapatuko liskarrarengatik
Aurrerak Abantoren aurka jokatu zuen partida joan den zapatuan [martxoak 1], eta Abantokoen hainbat irain tarteko, jokalari ondarrutar batek Abantoko ikusle bat erasotu zuen. Aurrera Kirol Elkartea damututa agertu da gertakarien aurrean.
Aurreraren eta Abantoren arteko partida.Iñaki Beitia Zapatuan [martxoak 1] Ondarroako Aurrerak eta Abantok Zaldupe futbol zelaian jokatutako partidan egon zen liskarraren harira, Ondarroako Aurrera Kirol Elkarteak barkamena eskatu du. Jakitera eman dutenez, partida bamaitu eta berehala, atezain ondarrutarrak fisikoki erasotu zuen Abantoko ikusleetako bat.
Mikel Santiso Aurrerako presidentea damututa agertu da gertakarien aurrean. Partida “normala” izan zela azaldu du, baina, Abantoko gazte kuadrila bat atezain ondarrutarrari “burla egiten eta irainak esaten” aritu zela adierazi du, irain matxistak tarteko. Hala ere, gertatutakoa onartzen ez dutela azpimarratu du Santisok: “Erraza da kanpoko zerbait gaizki dagoenean esatea, baina, orain guri tokatzen zaigu gertatutakoaren aurrean barkamena eskatzea. Gure aldetik esan behar dugu ez dugula gertatu zena onartzen, nahiz eta gure futbolariak egindakoa izan den. Irainak ondo ez dauden arren, jotzea are okerragoa da”.
Irainek ez dutela jokalari ondarrutarraren jarrera justifikatzen nabarmendu du Santisok: “Damututa gaude gertatu zenarekin, eta barkamena eskatu diegu Abantokoei. Egindakoa ez dago ondo, eta ez dago justifikatzerik“. Halaber, federazioaren aldetik jasoko duten zigorraren zain daude Aurrerakoak.
