Finalaurrekoen fasean sartu dira Beteranoen Trinkete Txapelketan
Martxoaren 16an eta 23an jokatuko dituzte finalaurrekoak. Finala apirilaren 6an izango da.
Joan den domekan [martxoak 2] jokatutako bi partidek amaiera eman zieten Beteranoen Trinkete Txapelketako ligaxka faseari. Domeka honetan [martxoak 9] partidarik ez dagoen arren, datozen bi domeketan [martxoak 16 eta 23] finalaurrekoak ikusteko aukera egongo da, eta apirilaren 6an, finala.
Mmartxoaren 16an izango da, eta txapelketako bi bikote gazteenek jokatuko dute elkarren aurka. Bikote irabazleak, ostera, Lander eta Foster bikotearen aurka jokatu beharko du final aurreko partida. Martxoaren 23an Lander-Foster eta Jaunarena-Etxezarraga bikoteen arteko itzuliko partida jokatuko dute: “Berdintasuna apurtzeko, Jaunarena eta Etxezarraga derrigortuta daude irabaztera”.
Joan den domekako partidei dagokienez, Rober-Egaña eta Jaunarena-Etxezarraga bikoteek eman zieten hasiera seigarren jardunaldiari; lehenengo bikotea nagusi izan zen kantxan, 30 eta 11 irabazi baitzuten. Lehenengo sakeekin batera, Jaunarena eta Etxezarraga ipini ziren aurretik, 0-3. Hala ere, irabazleek aurrea hartu, eta segidan markagailua irauli zuten, 7-3 aurretik ipiniz; errenta handituz joan ziren, markagailuan 22-5 Rober eta Egañaren alde ipini arte. Jaunarenak eta Etxezarragak apur bat hurbiltzea lortu zuten arren (28-10), Etxezarragak ez zuen “bere ohiko ziurtasuna erakutsi”, hainbat pilota galdu zituelako.
Bigarren partidan berriro Roberrek eta Egañak jokatu zuten, baina, Lander eta Fosterren aurka; Landerrek eta Fosterrek 30 eta 18 lortu zuten garaipena. Foster “oso ziur” ibili zen, eta hasi eta berehala 3 eta 0 ipini zuten markagailua. Rober eta Egañaren eguneko bigarren partida zen arren, “freskotasuna” erakutsi zuten, tanto gutziak borrokatuz. Hala, irabazleengana hurbiltzea lortu zuten, markagailua 17-15 ipiniz. Partidak aurrera egin ahala, baina, “nekea nabarituz” zihoan, eta 24-16 aurrea hartzea lortu zuten Landerrek eta Fosterrek. Azken lau tantoetatik hiru, sakez izan ziren.
