Mutrikuko Egaña frontoia irekita egongo da egunero
Egunero 09:00etatik 21:00etara irekita egongo da Egaña frontoia. Erreserbak egiteko prozedura eta gune itxiko araudia kaleratu du Mutrikuko Udalak.
Otsailaren 14an inauguratu zuten Egaña frontoi estali berria, eta Mutrikuko Udalak jakinarazi duenez, aurrerantzean irekita egongo da egunero, 09:00etatik 21:00etara. Horrez gain, erreserben prozedura eta erabileraren gaineko araudiaren nondik norakoak zehaztu ditu udalak.
Lekua erreserbatzeko kiroldegiko harrera zerbitzura deitu beharko da; 943 60 31 75 telefono zenbakira. “Astelehenetik ostiralera 09:00etatik 12:30era eta 16:00etatik 21:30era, zapatutan 09:00etatik 14:00etara, eta igandeetan 10:00etatik 12:30era”. Hala ere, telefonoz deitu nahi ez dutenek, online bidezko galdetegia beteta egin dezakete erreserba, beti ere, lehenengo, kiroldegira deitu eta helbide elektroniko bat emanda. “Behin helbidea eman eta gero, galdetegia partekatuko da erabiltzailearekin, eta erreserba egin ahalko du. Pertsona bakoitzak momentuan erreserba bakarra egin ahalko du, eta eguna pasa arte ezingo du berririk egin”. Mutrikuko Udalak adierazi duenez, erreserba ordaindu arte ez da behin betikoa egingo. “Bankuko transferentzia bidez edo Bizum bat eginda ordaindu ahalko da, eta ordainketa agiria mutrikukokiroldegia@gmail.com helbidera bidali beharko da. Hala ere, martxoko hilabetean zehar ez dira alokairu tarifak kobratuko, proba gisa erabiliko baita hilabete hau, erabiltzaileek ohitura hartu eta erreserbak egoki egiten direla ziurtatzeko“. Behin prozedura guztia amaitzean, behin betiko erreserba egingo da eta kiroldegiko harreratik jakinaraziko zaio erabiltzaileari.
Horrez gain, Egaña frontoia erabiltzeko lehentasuna izango dute eskola kiroleko jarduerek eta ikastetxeek, dagozkien eskola orduetan nahiz eskolaz kanpokoetan. “Kirol, kultura eta gizarte erakundeek ere lehentasuna izango dute, eskola kiroleko jarduerak ez dauden orduetan”. Mutrikun helbideratuta edo erroldatuta dauden entitate edo pertsonek ere lehentasuna izango dute erreserba egiteko orduan, baita, Mutrikuko Udalari dagokion baimena eskatu eta lortu duten entitateek: “Hala ere, udalerrian esparru itxi bat izateko beharra dela eta, udalak bere erabilera lehenetsi ahal izango du beste edozein jardueraren aurretik”.
Debekuak. Mutrikuko Udalak Egaña frontoian burutu ezin daitezkeen zenbait praktika mahaigaineratu ditu: “Erretzea, jatea, edatea edo hondakinak sortzen dituen edo hirugarrenei eragozpenak sortzen dizkien edozein ekintza; pilota lakainarekin aritzea; bizikletak edo motordun ibilgailuak sartzea; instalazioan animaliak sartzea; harmailak aldagela moduan erabiltzea; udal kirol zerbitzuaren baimenik gabe publizitatea jartzea; eta orokorrean, instalazioa behar bezala ez erabiltzea”.
