Ondarroako Neskatilen Elkarteak urteroko bilera egin du "kezkak" mahaigaineratzeko
Urteroko bilera egin dute Ondarroako neskatila edo enpakatzaileek. Beraien "kezkak" adierazi, pasa den urteko jarduerak errepasatu eta aurtengo egin beharrak proposatu dituzte.
Ondarroako Neskatilen Elkarteak urteroko bilera egin zuen barikuan.Ondarroako Neskatilen Elkartea. Ondarroako Neskatilen Elkarteak urteroko bilera orokorra egin zuen barikuan [otsailak 28] Ondarroako portuko lonja berrian, “pasa den urteko jarduerak errepasatu eta aurten egin beharreko ekimen berriak proposatzeko”.
Maria Angeles Muller buru duen kolektiboa zortzi emakumez osatuta dago, eta enkantea egin aurretik, lonjan lan egiten duten enpresentzat alturako arrantza ontzietatik datozen arrain kaxak pisatzea, sailkatzea eta antolatzea da lanaren funtzioa. “Ontziak iristen direnean eta arraina lonjara ekartzen denean, neskatila edo enpakatzaileak lanean hasten dira. Arrain kaxak banaka pisatzen dituzte, eta ondoren, sailkatu, izotza aldatu eta hurrengo eguneko salmentarako prest uzten dituzte. Zapoaren kasuan, tamainaren arabera ere sailkatzen dute. Lan hori ilunabarrean hasten da, goizaldean salmentarako dena prest egon dadin”, zehaztu du Koldo Goitia Eusko Jaurlaritzako Itsasertzaren Garapeneko, Portuetako eta Itsas Gaietako zuzendariak. Enpakatzaileak taldeka aritzen dira lanean, arrain lonjan, eta iraganean itsasontziak portura aste osoan zehar iristen baziren ere, gaur egun, domeka gauetan eramaten dute aurrera beraien jarduna.
Enpakatzaileak Ondarroako portuan daude bakarrik; izan ere, alturako arrantza ontzientzat jarduten dute, eta udalerrian mota honetako 10 itsasontzi daude, Euskadiko arrantza portu nagusienetako bat delarik. “Nahiz eta 80ko hamarkadan jarduera bizia izan zuen, gaur egungo egoera bestelakoa da”. Honek, arrantza sektoreari ez ezik, enpakatzaileen lanean ere eragin “zuzena” daukala azpimarratu dute neskatilek: “80ko hamarkadan Ondarroako portuan 250 enpakatzaile inguru zeuden, eta gaur egun, 8 langile profesional besterik ez daude, eta bataz besteko adina 52 urtekoa da”.
Egoera “arduratsu” honen aurrean Leandro Azkue arrantza sailburuordeak, eta Ixone Soroa eta Koldo Goitia zuzendariek beraien “kezkak” partekatu dituzte langileekin: “Ez dira sektorearen erabateko partetzat hartzen, gaixotasunak ez dira erabat profesionaltzat hartzen, eta batez ere, 52 urteko batez besteko adina dute”.
Neskatilen Elkartea. 2004an ONE -Ondarroako Neskatilen Elkartea- sortu zuten enpakatzaileek, “Ondarroako portuko neskatilen jardueraren garapena kudeatzeko, eta baita euren lanbidea hobetzen lagunduko zuten ekimen guztiak sustatzeko ere, lanbidea duina eta egonkorra izan zedin”. Izan ere, kolektiboaren “kezka” nagusienetako bat arrantza sektorearen paretzat ez hartzea da, arrazoi desberdinak tarteko: “Ondarroako portuko egoera dela eta (arrain gutxiago sartzen delako), langileek izaten dituzten eta gaixotasun profesionaltzat hartzen ez diren gaitzengatik, batez besteko adina ia 52 urtekoa delako, eta lan intrusismoagatik, besteak beste”.
