Txirrindulari juniorrek 40. Atxukale Saria lehiatuko dute domekan Mutrikun
Antolatzaileek parte hartze handia espero dute. 87 kilometroko ibilbidea 15:30ean hasiko dute, eta 17:40 inguruan amaitzea espero dute.
Domekan [martxoak 9] txirrindulari onenek zeharkatuko dute Mutriku, izan ere, 40. Atxukale Saria lehiatuko dute juniorrik onenek. Gazte mailako Gipuzkoako txirrindulari egutegiko bigarren lasterketa izango da domekakoa, eta 130 parte hartzailetik gora espero dituzte antolatzaileek. 87 kilometroko lasterketa izango da, eta 15:30ean emango diete hasiera; amaiera, aldiz, 17:40 eta 17:47 bitartean izatea espero dute.
Lastekerta Mutrikun hasi eta Debarantz abiatuko da. Handik Sasiola igaro, eta Mendarotik Elgoibarrerako bidea hartuko dute. Maltzagako bidegurutzera heltzerako, Soraluzerantz joango dira txirrindulariak, eta Osintxu pasa ostean, saihesbidea igaroko dute. Osintxura itzuli, eta ibilbide berdina atzerako norantzan egingo dute. Mutrikura heltzeagaz batera, Kalbariora bi aldiz igo beharko dute txirrindulariek, eta Sasiolatik Debarako bidea hartu. Bigarren itzulia egitearekin batera amaituko dute lasterketa, Mutrikun.
Oharrak. Mutrikuko Udalak jakinarazi duenez, lasterketa pasa bitartean Ertzaintzak zatika itxiko du errepidea; 15-20 minutu inguruko itxialdiak izango direla aurreikusten dute. Era berean, Jose Maria Altzibar kaleko bizilagunek zapatu [martxoak 8] iluntzetik aurrera kalean aparkatutako kotxeak kendu beharko dituzte: “Errepidea kontrolatu eta segurtasun hesiak ipini behar dira, beraz, ezingo da bertan aparkatu aurreko eguneko 20:00ak ingurutik aurrera. Urtean behin egiten den lasterketa da, eta pazientzia eskatu nahiko genieke bertako bizilagunei”.
Joan den domekan [martxoak 2] Eibarrek hartu zuen juniorren txapelketako lehenengo jardunaldia. 80 kilometroko ibilbidea egin zuten parte hartzaileek, eta Lier Maguregi izan zen azkarrena, 01:52:41eko denbora eginda; haren atzetik Xabat Irizar geratu zen, denbora bera eginda. Ostean, segundo bat gehiagorekin, hamalau txirrindulari heldu ziren helmugara. Mutrikukoaren ondoren, martxoko hurrengo lasterketak honakoak izango dira: martxoaren 16an Azpeitian, 22an Antzuolan eta 29an, Deban.
