Aurrerako atezainak ezingo ditu datozen hamabi partidak jokatu
Zapatuko [martxoak 1] gertakarien ondorioz, Bizkaiko Futbol Federazioak hainbat zigor eta isun ezarri dizkie Aurrerako bi jokalariri nahiz klubari. Aurrerak zigorrak onartu ditu: "Esan genuen zigorrak onartu egingo genituela, eta ondo ipinita daude"
Aurreraren eta Abantoren arteko partida.Iñaki Beitia Zapatuan [martxoak 1] Zaldupe futbol zelaian Aurreraren eta Abantoren artean gertatutako liskarren ondorioz, Bizkaiko Futbol Federazioak zigorra ezarri die ondarrutarrei. Hala, Mikel Santiso Aurrerako presidenteak jakitera eman duenez, liskarrean parte hartu zuen atezain ondarrutarrak ezingo du jokatu datozen hamabi partidetan, eta 144 euroko isuna ordaindu beharko du. Era berean, liskarrean parte hartu zuen beste jokalari ondarrutar batek ere ezingo du datozen lau partidetan jokatu, 48 euroko isunagaz batera.
Bestalde, Aurrera Kirol Elkarteari 150 euroko isuna ezarri dio federazioak. Izan ere, partida berean Aurrerako ikusleetako batek federazioko marrazainetako bat iraindu eta mehatxatu zuen.
Zigorrei dagokienez, Santisok “egokiak” direla adierazi du: “Esan genuen zigorrak onartu egingo genituela, eta ondo ipinita daude. Zerbait gaizki eginez gero, ordaindu egin behar da, eta hala izango da”. Gaineratu duenez, Aurrerak ere bere jokalariak zigortuko ditu, klubaren araubideekin bat datozen zigorrak ezarriz.
