Emakumeen Eskuz Binakako Txapelketa Nagusia hartuko du Etxebarriak
Domekan [martxoak 9] 12:00etan hasiko dira partidak. Eliteko eta Urrezko Ligaxkako partida bana ikusi ahalko da.
Etxebarriko Txutxo udal pilotalekuan punta-puntako pilotariak elkartuko dira domekan [martxoak 9]. Izan ere, 12:00etatik aurrera Binakako Master Laboral Kutxa txapelketaren hurrengo jardunaldia lehiatuko dute bertan pilotariek.
Bi partidagaz gozatzeko aukera egongo da. Jardunaldiari hasiera elite mailakoek emango diete. Garai eta Bertiz ariko dira kolore gorria defendatzen, eta Salsamendi eta Erasun, ostera, urdina. Ostean, Urrezko Ligaxka jokatuko dute beste lau pilotarik: Arrizabalaga-Bergara bikotea ariko da Etxegarai-Arrillagaren aurka.
Arrizabalagak eta Bergarak aurreko jardunaldian galdu bazuten ere, Arrizabalagak bere burua “datorrenari eusteko prest” ikusi zuela adierazi zuen. Hala, “behetik gorako” ibilbidea egiteko prest dago bikotea: “Aurreikuspenek diote gu behetik gora goazela; eurak [Etxegarai eta Arrillaga], berriz, porrot gogor batetik datoz, gainera, sentsazio oso onik transmititu barik”. Helburu bakarra “bai ala bai irabaztea” izango dela iragarri du, eta beraien jokoan “beste aurrerapauso bat” egiteko prest daudela nabarmendu.
