Gizontasunaren eta sexualitatearen inguruan hitz egingo dute Etxelilan
'Gizonak eta feminismoa' ikastaro zikloaren baitan, hirugarren saio independentea egingo dute martxoaren 11n Etxelilan, 'Gizontasuna eta sexualitatea: Zerk egiten nau hetero?' izenburuagaz.
Maskulinitateari buruzko gogoeta kritikoa sustatzeko helburuagaz, gizonei zuzendutako Gizonak eta feminismoa ikastaro zikloa abiarazi zuen azaroan Ondarroako Etxelilak. Guztira lau ikastaro independentek osatuko dute zikloa, saio bakoitzean gai zehatz bat landuko delarik. Hirugarren saioa martitzenean [martxoak 11] egingo dute, 17:00etatik 20:00etara, Etxelilan.
Gizontasuna eta sexualitatea: Zerk egiten nau hetero? izenburuagaz, hausnarketarako tartea hartuko dute. Asier Arizkorreta Hurtado Emagin Elkarteko kideak dinamizatuko du saioa, eta maskulinitatearen eta sexualitatearen arteko harremana aztertuko dute: “Heterosexualitatea arau gisa definitzen duten arau sozialak zalantzak jarri eta arau horiek gizonen identitatean eta sexu portaeran nola eragiten duten aztertuko dugu”.
Ikastaroan parte hartu nahi dutenek bihar [martxoak 7] dute izena emateko azken eguna, 94-613 40 08 edo 664 54 73 67 telefonoetara deituz edo idatziz edo etxelila@ondarroa.eus helbidera idatziz. Ikastaroaren prezioa 5 eurokoa da, eta egunean bertan ordaintzeko aukera egongo da.
