"Arrakastatsua" izan da Zaldupe Eskolako ikasleek egindako desfilea

Cristobal Balentziagaren lana abiapuntutzat hartuta moda desfilea egin zuten atzo [martxoak 10] Ondarroako Zaldupe Eskolako umeek.

Garazi Burgoa Aldarondo

Ondarroa

2025/03/11

Cristobal Balentziaga diseinatzailean oinarrituta desfilea egin zuten atzo [martxoak 10] Ondarroako Zaldupe Eskolako ikasleek, umeen sormena, talde lana eta artearekiko interesa sustatzeko helburuagaz. 15:00etan eman zioten hasiera desfileari atzo, eskolako jolastokian, eta Josebe Azpiri Zaldupe Eskolako zuzendariak adierazi duenez helburuak “guztiz” bete dituzte, ekitaldia “arrakastatsua” izan baitzen.

“Desfilea zoragarri atera zen, eta umeek ilusio handiz parte hartu zuten, beren diseinuak erakutsiz, Cristobal Balentziagaren irudia abiapuntu gisa hartuta. Prozesu osoan eurak izan dira diseinatzaile, estilista, jostun eta esatariak, modu autonomoan eta sortzailean lan eginez”. Ikasleek material desberdinekin esperimentatzeko aukera izan dute prozesuan zehar, kolore eta forma desberdinekin jolastu, eta modaren mundura gehiago hurbildu dira, “jolasaren eta arte adierazpenaren bitartez”.

Ekitaldira ikasleen familiak joateaz gain, Irina Alkorta jarduneko alkatea eta hezkuntza batzordeburua, Iñaki Orbe, Hezkuntza Saileko Bizkaiko Lurralde ordezkaria, Lore Aretxaga Pedagogi Berrikuntzaren arduraduna eta Mikel Juaristi Aniztasunaren eta Inklusiorako zuzendaria ere bertaratu ziren. “Guztion elkarlanari esker ekitaldia esperientzia ahaztezina bihurtu da, eta umeek protagonismo osoa izan dute. Ikasleen ilusioa, motibazioa eta talentua agerian geratu ziren, eta argi utzi zuten arteak eta sormenak gure hezkuntzan duten balioa”, zehaztu du Azpirik. Gainera, eskerrak eman dizkie bertaratu guztiei: “Eskerrik asko parte hartu duzuen guztioi, eta bereziki, ikasle, irakasle eta familiei, ekimen hau posible egiteagatik!”.

[ARGAZKI GALERIA]