Gaztetxeak bertsotan zapatuan iritsiko da Mutrikura
«Gazteen ahots kritikoa plazaratzea» du helburu Gaztetxeak bertsotan egitasmoak.
Gaztetxeak bertsotan egitasmoari hasiera emango diote barikuan [martxoak 14] Itsasuko Goxoki Gaztetxean, eta bigarren hitzordua Mutrikun izango da, zapatuan [martxoak 15], 18:30ean. «Gazteen ahots kritikoa» plazaratzea da egitasmoaren helburua, eta gazteen artean bertsolaritza zabaldu, bertsolari gazteei lekua eman, eta gaztetxeak elkartzeko eta politizatzeko espazio direla aldarrikatu nahi dute saio horiekin.
Antolatzaileek zehaztu dutenez, bertsoarekiko eta gaztetxeekiko kezkak plazaratzea da xedea, bien arteko harremana estutu, eta interesa duen ororentzako espazio «erosoa» eskainiz: «Bertsozaleentzat eta bertsoak inoiz entzun ez dituen jendeentzat dira saioak; finean, edonorentzat. Festa giroko saio dibertigarriak izango dira. Horretarako, 2000. urtetik aurrera jaiotako 24 bertsolarik parte hartuko dute».
Zapatuko Mutrikuko Gaztetxeko saioan sei bertsolarik parte hartuko dute, bikoteka: Aroa Arrizubieta eta Unax Aizpurua, Iraide Onaindia eta Maddi Agirre eta Joanes Azpillaga eta Julene Iturbe. Gai jartzaile lanetan Marina Basurko arituko da. «Zapatuan saiora hurbiltzera animatu nahi ditugu herritarrak. Gainera, ostean DJa izango dugu eguna borobiltzeko», adierazi dute gaztetxeko kideek.
Hurrengo saioa martxoaren 21ean izango da Hernaniko Kontrakantxa Gaztetxean, eta martxoaren 22an Altsasun osatuko dute laugarrena. Finalaurrekoak, aldiz, eguenetan izango dira: apirilaren 10ean Gasteizen eta apirilaren 17an Bilboko 7katu Gaztetxean. «Publikoaren parte hartzean ere jarri nahi izan dugu fokua. Izan ere, publikoak zuzenean hartuko du parte bertso saio hauetan, epaile lanak eginez, eta beste zenbait ariketetan elkarri eraginez».
